Муҳаммад Салоҳ гол уриш бўйича барча замонлар рекордини ўрнатди

Англия Премьер-лигасининг 29-турида мусобақа пешқадами “Ливерпуль” Бирмингемда “Астон Вилла” меҳмони бўлиб, муҳим учрашувда 2:2 ҳисобида дуранг ўйнади.

У баҳсда биттадан гол ва ассист қайд этиб, жамоасига бир очко олиб берган Муҳаммад Салоҳ Англия Премьер лигасининг барча замонлардаги рекордини ўрнатди.

Squawka статистика марказининг маълум қилишича, мисрлик футболчи жорий мавсумдаги сафар учрашувларида 15 марта мезбонлар дарвозасини ишғол қилди. Ҳали Англия чемпионатида бирор футболчи бир мавсумда рақиб майдонида бу қадар кўп тўп киритмаган. Мавсум давом этаётганини инобатга олсак, 32 ёшли ҳужумчида ўз рекордини янгилаш ва яхшилаш имкони етарли.

Аввалги рекорд ҳам “Ливерпуль” вакилига тегишли эди. Машҳур ҳужумчи Луис Суарес 2013-2014 йилги мавсумда рақиблар майдонига ўйинларда 14 та тўп киритган.

Муҳаммад Салоҳ жорий мавсум барча турнирларда 37 та беллашувда иштирок этиб, 29 та гол ва 20 та ассист муаллифи бўлди.