Муҳаммад Салоҳ ўзига янги жамоа танлади

“Ливерпуль”нинг ўтган мавсум Англия чемпионлигини қўлга киритишига катта ҳисса қўшган Муҳаммад Салоҳ фаолиятида жиддий ўзгариш қилишни маъқул кўрди.

Саудия Арабистонининг “Ал-Иттиҳод” клуби мутасаддилари Муҳаммад Салоҳ ва унинг атрофидагилар билан ҳамкорлик ва шартнома шартлари бўйича принципиал келишувга эришди.

Бу ҳақда Topskills нашри ўз манбасига таяниб хабар берди.

Мавжуд маълумотларга кўра, “Ливепуль” жорий мавсум ўйинида жиддий пасайиш кузатилаётган 33 ёшли  мисрлик  футболчисини яқин трансфер ойнасидаёқ сотиш имкониятини кўриб чиқишга тайёр. Мерсисайдликлар Салоҳни 30 миллиондан 50 миллион фунт стерлинггача бўлган сумма эвазига қўйиб юборишга рози, айрим шартлар бажарилганда эса янада камроқ компенсацияга ҳам розилик бериши мумкин.

“Ал-Иттиҳод” учун эса молиявий томон муаммо эмас, чунки футболчи таклиф этилган шартларни аллақачон қабул қилгани айтилмоқда.

Шунингдек, Салоҳ йилига тахминан 210 миллион фунт стерлинг маош олиши мумкинлиги, икки йиллик шартномасининг умумий қиймати эса қарийб 420 миллион фунтни ташкил этиши маълум қилинди.

Саудия Арабистони клуби музокараларни тезлаштирмоқда, чунки улар бошқа даъвогарлар – “Ал-Ҳилол”  ва “Ал-Қодисия”ни ортда қолдириб,  муҳим  келишувни имкон қадар тез якунлашни мақсад қилган.