Муҳаммад Салоҳни тўрт мамлакатдан беш клуб талашяпти

Миср терма жамоаси ҳужумчиси Муҳаммад Салоҳнинг “Ливерпуль”даги келажаги ҳамон мавҳумлигича қолмоқда. Гарчи яқинда юз берган зиддиятдан кейин клуб раҳбарияти ва бош мураббий Арне Слот билан ўзаро келишиб олганига қарамай, 33 ёшли футболчи жамоадан кетиши мумкинлиги айтилмоқда.

Журналист Экрем Конур маълумотларига кўра, Европа Чемпионлар лигасининг амалдаги ғолиби “Пари Сен-Жерман” клуби раҳбарлари ҳам Муҳаммад Салоҳни жамоага олиб келиш мақсадида унинг атрофидаги вазиятни кузатиб бормоқда.

Салоҳга даъвогарлик қилаётган клублар сафи тобора кенгайиб боряпти. Хусусан, “Ювентус” ва “Галатасарой” ҳам тажрибали тўпурарни ҳамкорликка чорламоқда.

Осиё футболи вакиллари орасида Саудия Арабистонининг “Ал-Иттиҳод” ва “Ал-Ҳилол” клублари ҳам “пойга”дан чиқиб кетгани йўқ.

Transfermarkt сайтида Муҳаммад Салоҳнинг трансфер қиймати 30 миллион еврога баҳоланган.

33 ёшли ҳужумчининг “Ливерпуль” билан амалдаги шартномаси 2027 йил ўрталаригача мўлжалланган. Жорий мавсумда футболчи “қизиллар” сафида 20 та ўйинда майдонга тушиб, бешта гол урди ва тўртта голли узатмани амалга оширди.