Мундиал финалини бошқарган ҳакам фаолиятини якунланди

Словениялик машҳур ҳакам Славко Винчич профессионал фаолиятини якунлади. Бу ҳақда Словения футбол иттифоқи матбуот хизмати расмий сайти орқали маълум қилди.

Эслатиб ўтамиз, Винчич 2026 йилги жаҳон чемпионати финал баҳсини бошқарган эди. Мазкур ҳал қилувчи ўйинда Испания қўшимча дақиқаларда Аргентина устидан 1:0 ҳисобида ғалаба қозонган.

Славко Винчич 2010 йилдан бери ФИФА тоифасидаги ҳакам сифатида фаолият юритиб келарди. У нафақат ЖЧ-2026 финали, балки 2023/2024 йилги мавсумдаги УЕФА Чемпионлар лигаси финалида ҳам бош ҳакам сифатида ишлаган. Ўша учрашувда «Реал» Дортмунднинг «Боруссия» жамоасини мағлуб этган.

Шунингдек, Винчич 2021/2022 йилги мавсумда «Айнтрахт» ва «Рейнджерс» жамоалари ўртасидаги УЕФА Европа лигаси финалини ҳам бошқарган. Ушбу беллашув асосий ва қўшимча вақтда 1:1 ҳисобида якунланиб, пенальтилар сериясида «Айнтрахт» 4:3 ҳисобида устун келган.

Жаҳон чемпионати-2026 доирасида 46 ёшли Винчич жами тўртта ўйинни бошқарди. У ушбу баҳсларда 12 та сариқ ва 2 та қизил карточка кўрсатди.