Мундиал қаҳрамони бўйича бирорта таклиф тушмади

Аргентина миллий терма жамоаси юлдузи Энцо Фернандес янги мавсумни ҳам “Челси”да ўтказиши тобора ойдинлашиб бормоқда.

Журналист Киран Гилл маълумотига кўра, Аргентина терма жамоаси сафида жаҳон чемпионати ажойиб ўйин намойиш этганига қарамай, Лондон суперклуби ҳозирча бошқа жамоалардан футболчини сотиб олиш бўйича ҳеч қандай расмий таклиф олмаган.

Бунинг асосий сабаби “Челси” футболчи савдосидан олишни истаётган юқори трансфер суммасидир.

Энцо Фернандес 2022 йилги жаҳон чемпионатида кўрсатган самарали ўйинидан кейин 2023 йилда “Бенфика”дан “Челси”га 121 миллион евро эвазига ўтган эди. Унинг амалдаги шартномаси 2032 йил 30 июнгача мўлжалланган.

2025/2026 йилги мавсумда аргентиналик ярим ҳимоячи барча мусобақаларда 54 та учрашув ўтказиб, 15 та гол ва 7 та голли узатма қайд этган.