"Мундиалда жамоангизни кўриш ёқимли, Ўзбекистон чемпионатидан тавсия қилинган футболчиларни кузатяпмиз". "Крилья Советов" устози SPORTS.UZ сайти учун интервью берди

Бугунги кунда Россия премьер-лигаси қатнашчиси ҳисобланган “Крилья Советов” клуби бош мураббийи сифатида фаолият кўрсатиб келаётан Магомед Адиев мухлисларимизга яхши таниш.

У бунгача “Химки”, “Ахмат”, “Шахтёр” (Қозоғистон), Қозоғистон миллий терма жамоаларини бошқарган. Айниқса, Қозоғистон терма жамоасига бошчилик қилган чоғида терма ўзининг энг яхши натижасини кўрсатган. Қолаверса, Адиев ўзбек футболига ҳам бефарқ эмас.

Sports.uz журналисти яқинда “Крилья Советов” устози билан алоқага чиқди. Ўз навбатида Магомед Мусаевич сайтимиз учун интервью беришга рози бўлди.  

- Магомед Мусаевич, ўзбек футболи янгиликларини кузатиб боряпсизми? Хабарингиз бўлса керак, италиялик Фабио Каннаваро миллий терма жамоамизни бошқаряпти. Бу ҳақида нима дея оласиз? У ўзбек футболи ва миллий терма жамоа ривожига қанчалик ҳисса қўша олади?

- Ўйлашимча, бугунги кунда ўзбек футболини ривожлантириш бўйича бир қатор ишлар амалга ошириляпти. Жаҳон чемпионатидек катта турнирда иштирок этиш - бу албатта Ўзбекистон учун жуда яхши натижа. Табиийки, Ўзбекистон терма жамоаси мундиалда қатнашар экан, мен ҳам терма жамоангизга мухлислик қиламан. Фабио Каннаварони келишига тўхталадиган бўлсам, биламизки, у катта ном, маҳоратли ва кўпчилик тан олган футболчи сифатида барча билади. У жиддий натижаларга эришган. Катта-катта мусобақаларда ғалаба қозонган. Уни мураббийлик фаолияти тўғрисида гапирадиган бўлсам, рости, ҳозир бу ҳақида аниқ фикр айта олмайман. Мураббийлик фаолиятида катта тажриба ёки катта натижаларга эришганлиги ҳақида билмайман. Тимур Кападзе терма жамоа учун катта иш қилганди. Терма жамоани мундиалга чиқишига ўз ҳиссасини қўшганди. Ўзбекистонни тарихий натижа кўрсатишида Кападзени ўрни катта бўлди. Афсуски, унга яна фаолиятини давом эттириш учун имконият берилмади. Мутасаддилар Каннаваро сингари футболчилик фаолиятида таниқли номга эга бўлган инсонни олиб келишни хоҳлашди, шекилли. 

- Сиз билан охирги марта суҳбатлашганимизда Қозоғистон терма жамоасининг бош мураббийи эдингиз. Кўпчилик қозоқ ва ўзбек футболини солиштиришади. Бу сафар ҳам Қозоғистон жаҳон чемпионатидан четда қолди. Асосий муаммо нимада?

- Тўғри айтяпсиз, Қозоғистон йирик мусобақага чиқа олмади. Аввал бошида бу Қозоғистон учун қийин бўлишини айтгандим ва имкон қадар яхшироқ ҳаракат қилиш лозимлигини таъкидлаб ўтгандим. Гуруҳда Бельгия терма жамоаси ҳам бор эди. Бу рақибни яхши шаклланган жамоа дейишимиз мумкин. Уэльс ва Шимолий Македония ҳам яхши ўйнайдиган терма жамоалар қаторига кирадилар. Қозоғистон Шимолий Македония билан дуранг ўйнади. Яхши ўйин бўлди. Бошидан ҳаммаси тўғри йўлга қўйилган бўлганида эди, ҳозир жуда кўп нарса бошқача бўлиши мумкин эди. Қозоғистон тўғри йўлда кетяпти. Жамоада кўп нарса ўзгарган. Қозоғистонда индивидуал жиҳатдан кучли футболчилар бор. Катта амбицияга эга бўлган ёш, келажаги порлоқ ўйинчилар чиқмоқда. Яқин йилларда Қозоғистон терма жамоаси рақобатбардош, кучли терма жамоага айланади. Қозоғистон жаҳон чемпионатига чиқа олмаган бўлс-да, “Қайрат” Европа Чемпионлар лигасида гуруҳ босқичига йўлланма олди. Бу ҳам катта кўрсаткич. Қозоғистонни келажакда яхши натижалар кўрсата олиши учун катта потенциали бор.  

- Илгари МДҲдан қайсидир терма жамоа мундиалда қатнашса албатта қўллаб-қувватлардик. Энди эса МДҲ мамлакатлари Ўзбекистон терма жамоасини жаҳон чемпионатида кузатиб боришади ва қўллашади. Айтинг-чи, мундиалда терма жамоамиздан нималарни кутяпсиз?

- Юқорида айтиб ўтганимдек, мундиалда албатта Ўзбекистон терма жамоасини кузатаман ва мухлислик қиламан. Терма жамоангиз ўйинларини кузатиш жуда ҳам қизиқ бўлади. Бундай катта турнирда Ўзбекистон иштирокидаги учрашувларни кўриш албатта ёқимли. Нима кутишим мумкин? Яна қайтараман: терма жамоангиз ўйинини кўриш қизиқарли. Биринчи галда терма жамоангиз гуруҳдан кейинги босқичга чиқишини истайман ва  бундан хурсанд бўлардим. Ўзбекистонга ижобий натижаларга эришишини тилаб қоламан.

- Агар қачондир сизга миллий терма жамоамизни бошқариш имконияти таклиф қилинса, қабул қилармидингиз?

- Бундай нарсаларни унчалик ёқтирмайман. Дастлаб бундай таклифларни бериш ва сўнг яхшилаб ўйлаб кўриш керак. Қачонлардир шундай ҳолат юзага келса, ана шунда ўйлаб кўрса бўлади. Бугунги кунда ўзбек футболи ривожланиб боряпти. Бир қатор иқтидорли ва кучли ўйинчилар билан шаклланган жамоани бошқариш ҳамма учун яхши. Маҳоратли, яхши савиядаги футболчиларга эга жамоада ишлашни ҳар қандай мураббий хоҳлайди. Албатта, бундай футболчилар билан натижа кўрсатишинг нисбатан осон бўлади.

- “Крилья Советов” клубидаги ишларингиз яхшими?

- “Крилья Советов” клубида барчаси яхши кетяпти. Тўғри, охирги турлардаги натижалар мураббий сифатида мени қониқтирмаяпти. Чемпионат бошида бизда барчаси яхши эди. Кейинчалик бир қатор тажрибали футболчиларни жароҳат олиши натижасида кўнгилдагидек ўйинларни ташкил қила олмай қолдик. Бу борада клуб мутасаддилари билан муносабатимиз яхши. Улар билан вазиятни тўғри ҳал қилиб, режалаштирган ҳолда келажакка умид ва ишонч ила иш ташкил қилмоқдамиз. Аслида муаммоимиз нимада эканини яхши биламиз. У қадар катта муаммо йўқ, барчаси жойида. Аста-секин вазиятни яхшилай оламиз. Чемпионатга яхши тайёргарлик кўряпмиз. Жароҳат олганлар ҳолатини яхшилаб боришмоқда. Улар жамоанинг умумий машғулотларида қатнашишяпти.

- Клубингизда қайси ўзбек футболчиларини кўришни хоҳлайсиз?

- Айтиб ўтганимдек, миллий терма жамоада бир қанча тажрибали ўйинчилар бор. Ўйинимизни кучайтира оладиган ва Ўзбекистон чемпионатидан бизга тавсия қилишган бир нечта футболчиларни  кузатиб боряпмиз. Ҳозирдан бирортасини аниқ айта олмайман. Ҳужумчи жуда зарур ва бу борада кузатув ишларини амалга оширяпмиз. Ҳужумчимиз Гаич ҳозир оптимал формасида эмас. Мен жон деб жамоамизга Шомуродовни олишим мумкин эди.