Муз устида яралган нафосат

Мазкур спорт тури XIX асрнинг 60 йилларида пайдо бўлган. Фигурали учуш бўйича 1891 йили илк маротаба Европа чемпионати ўтказилган бўлса,  жаҳон чемпионати 1896 йилда ташкиллаштирилган.

Бу спорт тури қисқа ва эркин дастурдан иборат. Иштирокчи икки босқич учун алоҳида баллга эга бўлади. Давомийлиги икки дақиқаю эллик сонияни ташкил этган қисқа дастурда 7 та элемент бажарилиши лозим. Агар спортчи ажратилган вақтдан беш сонияга бўлса ҳам ўтиб кетса, ҳакамлар унинг умумий ҳисобидан бир баллни олиб ташлайди. Эркин дастурни эса аёллар тўрт, эркаклар беш дақиқа давомида ижро этади.

Ҳозирги кунда дунёнинг бир қатор мамалакатларида фигурали учиш спорт тури бўйича  мактаблар мавжуд. Жумладан, Ўзбекистонда фигурали учиш мактаби ҳам фаолият кўрсатмоқда.  Пойтахтимизда 1972 йил ташкил этилган мазкур спорт тўгарагида дастлабки йиллар 200 нафарга яқин спортчи шуғулланган. 1980 йилда ўсмирлар ўртасида ўтган жаҳон чемпионатининг жуфтлик баҳсларида мазкур мактаб тарбияланувчилари Марина Никитюк ва Рашид Қодиркаевлар кумуш медаль соҳибига айланишди. 1991 йилда Алина Спиргиаду ва Юрий Разгуляев спорт рақси бўйича ўсмирлар ўртасида жаҳон чемпиони унвонига эга бўлди. Шунингдек, бу мактаб тарбияланувчилари Татьяна Малинина, Роман Скорняков, Наталья Пономарёва, Евгений Свирдовлар ҳам жаҳон ареналарида муваффақиятли иштирок этди.

Шу ўринда айтиш мумкинки, мамлакат қишки спорт турларини янада ривожлантириш мақсадида сўнгги икки йилда янгидан-янги спорт иншоотлари барпо этилмоқда.

Улардан бири пойтахтимизда қад рослаган кўп тармоқли “Ҳумо Арена” муз саройидир. Мажмуа 12 минг 500 нафар кишига мўлжалланган мазкур иншоот худудида, муз аренаси, машғулотлар майдони, болалар ўқув-кўнгилочар парки, оилавий дам олиш марказлари, амфитеатр, фавворали хиёбонлар, ресторан ва рекрацион зоналар, боғ ҳамда замонавий паркинглар мавжуд. Бу каби спорт иншоотларининг қурилиши мамлакатда қишки спорт турларина янада ривожлантиришга катта ҳисса қўшади.

Умид қиламизки, бу каби яратилаётган кенг имкониятлар Ўзбекистонда қишки спорт турларини аҳоли ўртасида янада оммалаштириб, улар ўртасидан истъдодли спортчилар камол топади ва мамлакат шарафини янада дунё бўйлаб юксалтиради.

Ўғилой АБДУСАТТОРОВА

ЎзДЖТУ халқаро журналистика

202 – гуруҳ талабаси