Иззатилло Пўлатов: "Чемпионлик пойгасидаги "Нефтчи"дан бир очко олганимиз одамни хурсанд қилди"

Хабарингиз бор, Суперлиганинг 28-туридан ўрин олган баҳсда "Бухоро" "Нефтчи" билан куч синашиб, 1:1 ҳисобидаги дурангга имзо чекди. Ушбу тўқнашувдан сўнг "Бухоро" ҳимоячиси Иззатилло Пўлатов Sports.uz сайтига интервью бериб, бўлиб ўтган ўйин, Ўзбекистон кубогидаги ҳакамларнинг қарори ва келажаги ҳақидаги саволларга жавоб берди. 

1. Бугун "Бухоро" клуби "Нефтчи"га қарши муҳим учрашувда иштирок этиб, керакли очколарни қўлга киритди. Бўлиб ўтган ўйин ҳақида фикрларингиз. 
 
"Бу учрашув жуда қизиқарли бўлиб ўтди. Шунингдек, бу ўйин мухлисларга ҳам ёқди деб ўйлайман. Сабаби, ўйин давомида биз ҳам, "Нефтчи" ҳам анча ҳужумкор ўйин кўрсатди". 

2. Биринчи даврада "Бухоро" "Нефтчи"га минимал ҳисобда имкониятни бой берди. Бугун эса жамоа дурангга эришди. Бу натижадан кейинги ҳиссиётларингиз қандай бўлди? 
 
"Биринчи даврадаги ўйинда сўнгги дақиқаларда гол ўтказиб юборганмиз ва бу жуда аламли бўлган. Ўша тўқнашувда ҳам фарғоналикларга яхшигина қаршилик кўрсатган эдик. Албатта, 1-даврадаги мағлубиятнинг аламини олишимиз керак эди. Бундан ташқари, бугун ўз мухлисларимиз олдида ҳаракат қилиб, ўзимизнинг барча имкониятларимизни ишга солдик. Жамоамиз билан бирлашиб, яхши ўйин намойиш этдик деб ўйлайман. Кейин чемпионлик учун курашаётган ва фаворит ҳисобланган жамоага қарши дуранг натижа қайд этиш - яхши ҳисобланади. Ҳозирги кунда ҳар бир очкомиз олтинга тенг деб ўйлайман. Айниқса, бугунги учрашувдаги 1 очко одамни жуда хурсанд қилди". 

 3. "Нефтчи" кетма-кет 6 учрашувдан буён ғалаба қозониб келаётганди. Бу жамоалар орасида ОКМК ва "Динамо" каби кучли жамоалар ҳам бор эди. Лекин бугун фарғоналиклар Бухорода очко йўқотди. Ушбу учрашувга қандай тайёргарлик кўрдингиз ва жамоада мотивация қанчалик юқори эди? 
 
"Албатта, "Нефтчи"да ижодкор футболчилар борлигини билар эдик. Буни ўйиндан аввал кузатиб, ўрганиб чиққан эдик. Шу боис, биз асосан ўйин давомида қарши ҳужумда ҳаракат қилдик ва ўз мақсадимизга эришдик". 

4. Ўзбекистон кубоги финалини ҳам бироз эслаймиз. Ўша учрашувдан сўнг ЎФА ҳакамларнинг қарорлари бўйича йиғилиш ўтказди ва баҳсли вазиятларни тушунтириб берди. Назаримда, сиз ҳам бундан хабардорсиз. Уларнинг қарорларига ва тушунтиришларига фикрингиз қандай? 
 
"Финалдаги ҳакамларнинг қарорларига тўхталадиган бўлсак, ҳеч бирига қўшилмайман. Найим Қосимовнинг ҳар бир гапи кулгили, деб ўйлайман. Ўзбекистон кубоги финалида, жамоам 1:0 ҳисобида мағлубиятга учраб турибди, рақиб футболчиси оёғимга тепяпти, мен қандай қилиб майдонда ётишим ва вақт чўзишим мумкин?. Мен ўша вақтда оёғим оғриса-да, фақатгина вақтдан ютишни ва тезроқ ўйинни давом эттиришни ўйлаганман. У айтди: "ётган футболчи тезда ўрнидан турди деб". Қандай қилиб ютқазаётган жамоанинг ўйинчиси майдонда вақт чўзиб ётиши мумкин?. Қосимов умуман мантиққа тўғри келмайдиган гапларни гапиряпти. Ўша вазиятда оёғимдаги оғриқ билан иложи борича тезроқ ўрнимдан туриб, ўйнашга ҳаракат қилганман. 
 
Ҳакамларнинг қарорлари бўйича гапни давом эттирадиган бўлса, ўзи "Пахтакор" билан учрашувларда ҳакамларнинг қарорлари бўйича кўп панд еймиз. 2023 йилда ҳам 90+ да бизнинг зараримизга 11 метрлик жарима зарбаси қўйилган. Бу орқали биз Пролигага тушиб кетганмиз. Кейин яна бир ҳакам "менинг онамдан келди" деган. Агар профессионал ҳакамлар ўз ишларига қунт билан ёндашишса, уларнинг оила аъзоларига нисбатан ишлатилган қўпол сўзлардан келиб чиқиб қарор қабул қилишса, футболдан кетишгани яхши. Сабаби, баъзи жойларда бутун стадион футболчиларни ҳам сўкиши мумкин. Лекин ўйинчилар уларнинг гап-сўзларига қараб ўйнайман ёки ўйнамайман, деб кетмайди-ку. Назаримда, барибир жиддийроқ жарима беришлиги керак эди. Буни камроқ эътиборга олишди". 

5. Мавсум сўнгида "Бухоро" билан шартномангиз якунланади. Келажагингиз бўйича ўйлаб кўрдингизми? Биз сизни яқин йиллар ичида легионер сифатида кўришимиз мумкинми?
 
"Ҳозирги кунда келажагим бўйича ўйлаб кўрмадим. Чунки Бухоро клуби билан шартномам бор. Бу шартнома бу йилнинг охиригача амал қилади. Ҳозир бор эътиборимни жамоанинг натижаларига қаратиб, сўнгги секундларгача ёрдам беришни истайман ва бунга ҳаракат қиламан. Мавсум якунлангандан сўнг ҳамда шартномам тугагандан кейин келажагим бўйича ўйлаб кўрсам бўлади. Худо Хоҳласа, шу тарзда ўз устимда ишлаб, янада ривожланиб, яхшироқ ўйинларни намойиш этсам, легионерга айланиб қолишим мумкин".