МЮ ашаддий рақибидан ҳужумчи сотиб олмоқчи

«Арсенал» ҳужумчиси Габриэл Мартинелли ёзда жамоани тарк этиши мумкинлиги ҳақида хабарлар пайдо бўлди.

Экрем Конур тарқатган маълумотларга кўра, Лондон клуби ушбу ёзги трансфер ойнасида бразилиялик футболчини сотиш вариантини кўриб чиқишга тайёр. Унга жиддий даъворчилардан бири сифатида «Манчестер Юнайтед» тилга олинмоқда. Манбага кўра, «қизил иблислар» яқин вақт ичида Мартинеллини трансфер қилиш бўйича расмий таклиф йўллаши мумкин.

Габриэл Мартинелли 2019 йилда «Итумано» клубидан «Арсенал» сафига етти миллион евро эвазига келиб қўшилган. Унинг Лондон жамоаси билан амалдаги шартномаси 2027 йил 30 июнига қадар мўлжалланган. 2025/26 йилги мавсумда бразилиялик ҳужумчи «канонирлар» таркибида барча мусобақалар ҳисобида 53 та ўйин ўтказиб, 11 та гол урди ва 7 та голли пас муаллифига айланди. Transfermarkt портали Мартинеллининг трансфер қийматини 45 миллион евро атрофида баҳоламоқда.