“Наполи” Сульшерни хафа қилди

“Наполи” раҳбарлари “Манчестер Юнайтед”нинг сенегаллик ҳимоячи Калиду Кулибали трансферини сўраб қилган мурожаатига рад жавобини берди.

Манчестерликлар бош мураббийи Уле-Гуннар Сульшер  бир неча мавсумдан бери тажрибали ҳимоячини олишга ҳаракат қилмоқда. Кулибалининг ўзи ҳам кучини Англия премьер-лигасида синаб кўришга тайёр.

Ўтган йили клуб хўжайини уни “Манчестер Сити”га қўйиб юбормаган эди. Ўшанда неаполликлар 29 ёшли ҳимоячи учун 110 миллион евро сўраган эди.

Маълумотларга қараганда, “Манчестер Юнайтед” италияликларга 30 миллион евро атрофида маблағ таклиф қилиб, кескин рад жавобини олган. Кулибалининг ўзи ҳам клуб уни қўйиб юбормаётгани учун норозилигини билдирган.