"Наполи"га кеча нима учун дуранг етарли бўлмагани ҳақида тушунтириш!

Кеча неаполликлар чемпион бўлиб кетиши мумкин бўлган баҳсда "Салернитана" билан дуранг ўйнаб қўйди - 1:1. Хўш, 1 очко ҳам етарли бўлмасмиди "скудетто" учун? Нимага чемпионлик кечга сурилди? Жавоб эса оддий - йўқ, етмасди! 

Энди тушунтираман. "Наполи" ғалаба қозонса, очколари сони 81 тага етарди. Табиийки, Спаллетти шогирдлари ҳамма ўйинда ютқазса ва "Лацио" барча баҳсларни ўз фойдасига ҳал қилса ҳам 2 очко етмай қоларди. Шу тариқа, "Наполи" узоқ кутилган чемпионликни тантана қилган бўларди. 

Аммо Неапол клуби дуранг ўйнаб қўйди. Энди вазият математик (балки, нореаллик) томондан чигал бўлиб кетиши мумкин. "Наполи" ҳамма учрашувда енгилса, "Лацио" барини ютса, очколар тенг келади. Шунда ўзаро ўйинлар ёки тўплар фарқига эътибор қаратилиши керакдек, тўғрими? Йўқ, А Серияда энди унақа эмас. 

"Goal.com" нашрида бу бўйича алоҳида маълумот берилган. Унга кўра, А Сериянинг янгиланган регламентига мувофиқ чемпионлик ёки лигада қолиш учун курашаётган клублар очкоси тенг келиб қолса, қўшимча кўрсаткичларга қараб ўтирилмайди. Балки масалани ҳал этиш учун икки жамоа ўртасида плей-офф баҳси ташкил этилади. Даврон ака ёзганидек, асосий вақт дуранг билан тугаса, пеналтилар сериясига мурожаат этилади. 

Ҳали тугатганим йўқ:) "Лацио"дан ташқари "Юве"да ҳам "скудетто" учун имкон бор эди. Бунинг учун туринликлардан ҳам қолган ҳамма беллашувларда 100 фоизлик натижа қайд этилиши талаб этиларди. Бироқ бугун тунда Аллегри шогирдлари ҳам сенсацион тарзда "Болонья" билан дуранг ўйнаб қўйди. Шу тариқа, "зебралар" расман чемпионлик пойгасидан чиқди! 

Энг қизиғи, шунча қилган ҳисоб-китоб, математикамизни "Наполи" келаси тур шунчаки дуранг ўйнаб қўйиб ҳам йўққа чиқариб юборишга қодир. Алам қилади-а одамга)) 

Шоҳрух Зоиров.