“Навбаҳор”да йиғилиш ўтказилди. Жамоанинг стратегияси ўзгаради. Энди клубга Одил Аҳмедов ёрдам беради

Наманган вилояти ҳокими, вилоят футбол ассоциацияси президенти Шавкатжон Абдураззоқов “Марказий” ўйингоҳда клуб раҳбарияти, жамоа мураббийлар штаби ва футболчилари, жамоа мухлислари билан учрашди. Бу ҳақда клуб матбуот хизмати хабар берди.

Шавкатжон Абдураззоқов тадбир давомида вилоят ҳокими лавозимига тайинланганидан сўнг, бу “Навбаҳор” жамоаси билан илк учрашуви эканини таъкидлаб ўтди.

photo_2020-10-07_19-38-20

Гарчи таркиб бўйича Суперлиганинг унча-бунча жамоасидан қолишмасак, маҳоратли ва тажрибали футболчиларга эга бўлсак-да, “Навбаҳор” охирги 9 ўйиндан буён ғалаба қозона олмаяпти. Жорий мавсум бошида жамоанинг олдига Осиё Чемпионлар Лигаси йўлланмасини қўлга киритиш вазифаси қўйилганди. Бироқ жамоа кўп очко йўқотди.

Биз “Навбаҳор”ни юксалтириш, жамоанинг совриндорлар сафидан жой олиши, ОЧЛ йўлланмасини қўлга киритиши учун кўп ҳаракат қилдик. Лекин бу кутилган самарани бермади. Энди “Навбаҳор”нинг стратегияси ўзгаради ва асосий эътибор ёшларга қаратилади.

Келаси йилдан жамоа шарафини асосан маҳаллий ёшлар ҳимоя қилади. Биз наманганлик иқтидорли, ёш футболчиларни қўллаб-қувватлаймиз, инвестицияни маҳаллий ёш, иқтидорли футболчиларни етиштириб чиқариш учун йўналтирамиз.

Шунингдек, Наманганимизнинг фахри бўлган таниқли футболчи Одил Аҳмедов билан ҳамкорлик қиламиз. У жамоа учун қўлидан келганича ёрдам беришга тайёр.

Намангандаги барча футбол мактаблари ва академиялари энди “Навбаҳор” тасарруфига ўтади. Ушбу таълим масканларидаги барча футболчилар, энг аввало, “Навбаҳор” билан шартнома имзолайди.

Шунингдек, мухлисларга ҳам шуни эслатмоқчиманки, мухлис регламент ва қоидаларга асосан мухлислик қилиши, жамоанинг ички ишларига умуман аралашмаслиги лозим. Бундан буён мухлислик қоидаларини бузганлар “қора рўйхат”га олинади ҳамда умуман стадионга киритилмайди.

Мен ҳам ёшлигимда футболга қатнаганман ҳамда футболни жуда яхши тушунаман. Футболчи ҳам инсон, айрим вазиятларда адашади. Шундай ҳолатларда ўйинчини ҳимоя қилиш ўрнига айрим мухлислар уни ҳақорат қилади. Бу эса футболчига салбий таъсир кўрсатади.

Аксинча, футболчини қўллаб-қувватлаш, сен энг яхши ўйинчисан, дея кўнглини кўтариш лозим. Шунда у янада руҳланиб, ўйини “очилади”, – деди Шавкатжон Абдураззоқов.

photo_2020-10-07_19-38-20 (2)

Шундан сўнг, “Навбаҳор” клуби раҳбариятида ўзгариш юз берганлиги эълон қилиниб, Отабек Саматов “Навбаҳор” ПФК вице-президенти сифатида таништирилди.

Матнда хатолик топсангиз, ўша хатони белгилаб, бизга жўнатинг (Ctrl + Enter)