Назорат ўйини. "Сўғдиёна" "Қайсар" дарвозасига нақд 6 та гол киритди

Жиззахнинг "Сўғдиёна" жамоаси Туркиядаги йиғини доирасида Қозоғистоннинг  "Кайсар" жамоасига қарши ўртоқлик ўйини ўтказди. Голларга бой ўтган  учрашувда  жиззахликлар 6:0 ҳисобда ғалабага эришди.

Дастлаб "бўрилар" вакили Люпчо Дориев рақиб дарвозаси томон зарба йўллади. Аммо дарвозабон бу тўпни бартараф этишга муваффақ бўлди. 38-дақиқага келиб эса чап қанотдан узатилган тўпни Сухроб Иззатов голга айлантириб, ҳисобни очди. Шу тариқа биринчи бўлим 1:0 натижаси билан тугади.

Иккинчи бўлимга келиб ҳақиқий голлар ёмғири юз берди. Боиси 58-дақиқада Дориевнинг узатмасини Сардорбек Ҳошимов дарвозага жойлаб қўйди. Ушбу голдан 2 дақиқа ўтиб Саҳоб Рашидов ҳам ўз ҳисобига гол ёзиб қўйди. 63- дақиқага келиб Дориев рақиб дарвозабони  билан бирга бир вазиятга чиқиб гол уришга эришган бўлса, 73 дақиқада Умидбек Султонов узатмасидан сўнг Саҳоб Рашидов дублни расмийлаштирди. Учрашувнинг якунига яқин Фазлиддин Омомкелдиев ҳам ўз номини таблога ёздириб қўйди.