Назорат учрашувидаги автогол "Бунёдкор"га қимматга тушди

Бугун “Бунёдкор” клуби “Локомотив”га қарши назорат учрашувини ўтказди, бу ҳақида “қалдирғочлар” матбуот хизмати хабар бермоқда.

Ушбу баҳсда ҳар иккала тараф ҳам кўрикдаги футболчиларнинг хизматидан фойдаланди. Ўйин тақдирини эса биринчи бўлимдаги ягона гол ҳал қилди.

Меҳмонларнинг қарши ҳужумларидан бирида “Бунёдкор”нинг тожикистонлик легионери Даврон Эргашев кутилмаганда ва тушунарсиз вазиятда ўз дарвозасини ишғол қилиб қўйди.

Қолган дақиқаларда “Бунёдкор” тарбияланувчиларидан иборат ёш футболчилар “темирйўлчилар” дарвозаси олдида голга тортадиган етарлича хавфли вазиятларни ярата олган бўлса-да, бу ҳужумлар гол билан якунлангани йўқ. Аниқроғи, меҳмонлар посбони ажойиб ҳаракатлари билан рақибни муқаррар голлардан қутқариб қолди.