"Нефтчи" бугун Украина клуби билан ўйнайди

Янги мавсумга тайёргарлик доирасида Туркияда қишки ўқув-йиғин машғулотларини олиб бораётган "Нефтчи" жамоаси бугун навбатдаги назорат ўйинида Украинанинг яна бир вакили "Заря" футбол клуби билан юзлашади.

Украина клуби ҳақида қисқача маълумот. "Заря" 1923 йилда ташкил топган ва жорий йилда 100 йиллик юбилейини нишонламоқда. Собиқ Совет Иттифоқи даврида, аниқроқ қилиб айтганда 1972 йилда жамоа чемпионликка эришган.

Ҳозирги кунда "Заря" клуби Украина Премьер лигасида иштирок этиб келмоқда. Миллий чемпионатлардаги қўлга киритган энг юқори натижалари эса қуйидагича: 2016/2017, 2019/2020 ва 2020/2021 йилларда бронза медаллари соҳиби. Шунингдек, 2015 ва 2020 йилларда Украина кубогининг финалигача етиб борган.