"Нефтчи"нинг пешқадамлиги кутилган натижа, албатта..."

Фарғонанинг “Нефтчи” клуби жорий чемпионатни қандай бошлаганини яхши билсангиз керак. Жамоа 3 та учрашувда 3 та ғалаба қозонди ва йўқотишларсиз одимламоқда. Шу боисдан ҳозир ҳақли тарзда мусобақа жадвалида пешқадамлик қиляпти.

Зоминда “Сўғдиёна”га қарши баҳсда фарғоналиклар 0:2 ҳисобида навбатдаги ғалабасини тантана қилдилар. Ушбу учрашувда Нурилло Тўхтасинов “Нефтчи”даги илк голини киритишга эришди.

- “Нефтчи” 3 та турда 100 фоизли натижа қайд этди. Балки бундай стартни кутмаганлар бордир, лекин сиз бунга қанчалик ишонгандингиз?

- Ҳа, чемпионат стартини яхши бошлаб олиш ҳамиша муҳим. Шунинг учун биз ҳам максимал натижа кўрсатишга ҳаракат қиляпмиз. Омадимиз келяпти ва аҳил-иноқ бўлиб ушбу натижаларга эришяпмиз.

- “Сўғдиёна”га қарши беллашувда гол урдингиз ва “Нефтчи”нинг ғалабасига ёрдам бердингиз. Бу муваффақиятга эришиш оғир кечдими?

- Гол уриш доим ёқимли. Мен ўз голларим билан жамоам ғалабасига ҳисса қўшаётганимдан албатта хурсандман. Чемпионатда осон ўйинларнинг ўзи йўқ. “Сўғдиёна” билан учрашувда ўз имкониятларимиздан фойдаландик ва ғалаба қозондик.

- Бир қатор мураббийлар билан бирга ишлагансиз. Бу йил Виталий Левченко билансиз. Унинг аввалги мураббийлардан фарқли томонлари нимада?

- Ҳаммма мураббийни ўз ўйин услуби ва талаблари бор. Виталий Левченконинг менга ёққан тарафи шуки, барча футболчиларга бемалол ўйнаш учун имкон беради.

- Вазиятга реал қараганда, “Нефтчи”нинг дастлабки 3 та турдан кейин жамоанинг 1-ўринда туришини ўйлаганмидингиз?

- Ҳа, биз ютишимизга ишондим. Чунки Туркиядаги йиғинлар яхши ўтганди. Шу боис ғалабамизга шубҳам йўқ эди.

- Фарғонада “Пахтакор” мағлуб этилди. Ўша ғалабадан кейин “Нефтчи” чиндан ҳам бу йил фаворитлар қаторида эканига қанчалик ишондинглар?

- Сафардаги ғалабамизга уйдаги ғалабадан кейин ишончимиз ортиб бормоқда. Ҳеч қайси учрашув осон бўлгани йўқ. Яхши тайёргарлик кўрганимиз сабабли натижа бўляпти.

- Чемпионат олдидан раҳбарият тарафидан аниқ мақсад қўйилганми?

- Ҳа, албатта қўйилган. Худо хоҳласа медалларга ҳаракат қиламиз.

- Суперлигада кутилган ва кутилмаган натижалар бошланди, десак бўлаверади. “Нефтчи”нинг ҳозир пешқадамлик қилаётгани кутилган ҳолатми ёки...

- Бу кутилган натижа, албатта.

- Жамоа кейинги турда Фарғонада ОКМКни қабул қилади ва бўлажак баҳсга “Нефтчи” Тошкентда тайёрланмоқда. Олдинда турган учрашув ҳақида нималарни айта оласиз?

- Худо хоҳласа, ОКМК клубига қарши астойдил тайёргарлик кўряпмиз. Яхши ўйин бўлади. Фарғонада мухлисларимизни хурсанд қиламиз, деган умиддамиз.

- Олдин тўп сурган жамоаларингизга нисбатан “Нефтчи” нимаси билан фарқ қиляпти?

- 3 та жамоада тўп сурган бўлсам, деярли барчасида шароитлари бир хил.

Шуҳратбек Жўраев.