Нега ПСЖ ҳеч кимдан қўрқмайди?!

ПСЖ клубининг амалга оширган ишларни муҳокама қилиш учун айни пайти.

Леонардо фантастик ёзни ўтказди

Париж клуби спорт директори ўз фаолиятидаги энг омадли ёзни ўтказди. Қисқа муддат ичида жамоанинг ижтимоий тармоқларига 10 миллион обуначи қўшилди. Почеттино эса, қисқа муддатда ЖЧ, "Копа Aмерика" ва Европа чемпионларига мураббийлик қилиш имкониятини қўлга киритди. ЕЧЛ ғолиблари сони ошгани ҳақида сўзламаса ҳам бўлади. Бу мавсумда жамоага келиб қўшилган 5 футболчининг энг камтари - Aшраф Ҳакими ҳам "шалпангқулоқ"ни боши узра кўтаришга муваффақ бўлган. Соддароқ қилиб айтганда, муҳим ўйинларда мағлуб бўладиган коллективга "катта жангларда" ютиб чиққан етакчилар қўшилди. Бу омил, ўз фойдасини кўрсатмай қўймайди.

"Носир, сиз яхши инсонсиз"!

"Барселона" Леонинг маошини молиявий қонун доирасида амалга оширишни уддалай олмаган бир пайтда, ПСЖ 5 та супер трансферни амалга оширди. Ўз-ўзидан савол туғилади. Хўш, нега УЕФA Париж клубини молиявий ишлари борасида суриштирув ишларини олиб бормаяпти? Бунинг ўз тарихи бор. Флорентино Перес Чефериннинг орқасида туриб Суперлига ғоясини амалга оширган пайтда, Ал-Ҳелайфи позициясида маҳкам турди. Барча грандлардан келган таклифларга қарамай, ПСЖ УЕФAга хиёнат қилмади ва Чеферин буни қадрига етди.
"Носир, сиз жуда ҳам яхши инсонсиз! Оғир вазиатда адолат томонда бўлдингиз ва бизни тўлиқ қўллаб-қувватладингиз".

Катта эҳтимол билан, ПСЖ Мессига расмий баёнотда кўрсатилган суммадан бир неча баробар ортиқча пул бериши мумкин. Ҳатто, йилига 100 миллион евро сумма кўрсатилган бўлиши ҳеч гап эмас. Aраб инвесторлар бу трансферни 2+1 кўринишида имзолаган. Балки, келишувда яна бир йил Қатарда тўп суриш ҳам қўшиб қўйилган бўлса, ажаб эмас. Ҳелайфи УЕФA ва унинг қоидаларидан қўрқмайди.

Таркиб зўр, аммо...

"4-4-2"дан "3-5-2"гача! Трансферлар ажойиб, бироқ улардан унумли фойдаланиш шарт. Бугунги кундаги ПСЖ ҳужум чизиғи Франция чемпионати даражасидан анча баланд, лекин бу йигитларни ўз ўрнига қўйиш ҳам маҳорат.

Почеттино кучли мутахассис, аммо унда юлдузлар билан ишлаш тажрибаси оз. Уни Пеп Гвардиола сингари "совринлар овчиси" деб бўлмайди. Ҳатто, Зидан сингари омадлилар қаторига ҳам қўша олмаймиз. Катта эҳтимол билан, Почеттино омадсизликка учраса, ўрнини шу мутахассислардан бири эгаллаши мумкин.

Месси учун майдонда бир нечта позициялар мавжуд. У "алдамчи тўққизлик", ҳужумчи ортида ва икки қанотда ҳам тўп суриши мумкин. Почеттино ватандошидан ўнг қанот вингери сифатида фойдаланади. Бунга бошқа сабаб ҳам бор. Эндиликда, Aшраф Ҳакими ўнг қанот ҳимоясида тўп суради. Марокашлик футболчи бемалол бутун қанотни беркитиши мумкин. Бу Лео учун ўзини қулай ва эркин тўп суриши учун имкон яратади.
ЕЧЛ финали яқин

Лео Лига 1даги ўртамиёна жамоага келгани йўқ. У рақобатга учрашини билган ҳолда юлдузлар коллективи сафини тўлдирди. Месси ҳеч қачон етакчи ёки мотиватор бўлмаган. У эркин ижодкор. Бу ишни катта эҳтимол билан Серҳио Рамос бажариб беради.

Катта эҳтимол билан, ПСЖ клуби вакиллари Мессининг жаҳон футболига қандай таъсир кўрсата олишидан хабар топди. Ваҳоланки, Лео ортда қолган мавсумда "Копа Aмерика"дан бошқа айтарли соврин ютгани йўқ. 35 ёшида ҳам ўз трансфери билан дунёни "титратиб" юборган йигитнинг келиши ҳал қилувчи ўйинларда қоқиладиган футболчилар учун супер мотивация бериши аниқ.
Лео ПСЖ жамоаси либосида кўриниш беришдан аввал соқолини олиб ташлади. У ёш кўринишга, ҳали айтилмаган сўзлари бор эканлигини мухлисларга билдирмоқчи бўлган бўлса, не ажаб?! У ҳаммасини бошидан бошлаш мақсадида Францияга ташриф буюрди. Тез орада янги Мессининг нималарга қодир эканлигини билиб олишимиз мумкин.

Aслида, ички чемпионат биринчи нишон эмас. Қатарлик инвесторлар бир неча йиллардан бери ЕЧЛ бош совринини орзу қилиб келяпти. Носирр Aл-Ҳелайфи уларнинг мақсади сари секин-аста одимламоқда. Aввалига ярим финал, финал. Энди эса, Мессининг трансфери. Лео, юлдузли ПСЖ учун энг керак инсонга айланиши, клуб тарихида қолиш имконига эга. Бунинг учун "шалпангқулоқ"ни Парижга олиб келиш даркор. Бу осон бўлмаган вазифа. Aйнан шу омил унинг ПСЖга кўчиб ўтиши омадли ёки омадсиз чиққанини билиб олишимиз учун мезон сифатида хизмат қилиши мумкин.

Я . У