Нету Жотанинг вафотидан сўнг тушкунликка тушиб қолди

Педро Нету дўсти Диогу Жотанинг вафоти сабабли машғулотда қатнаша олмади.

"А Bola" нашрининг хабар беришича, "Челси" ҳужумчиси дўстининг ҳалок бўлгани ҳақидаги хабардан ларзага тушган ва пайшанба кунги машғулотга келмаган. Унинг клублар ўртасидаги Жаҳон чемпионатининг чорак финал босқичида "Палмейрас"га қарши ўйинда иштирок этиши ҳам гумон остида қолмоқда.

Нету ва Жота "Вулверхэмптон" сафида бирга тўп тепган, шунингдек, Португалия миллий терма жамоасида ҳам бирга бўлишган.

Лондонликлар бош мураббийи Энцо Мареска ўйинда қатнашиш ёки қатнашмаслик қарорини футболчининг ўзига ҳавола қилди.

- Бу бутунлай унинг қарори, у ўйнаш ёки ўйнамаслигини ўзи ҳал қилиши керак ва биз уни қўллаб-қувватлаймиз. Унинг ҳар қандай қарори тўғри бўлади. Шунинг учун у майдонга тушадими йўқми, фарқи йўқ - ўзини қандай ҳис қилишини кўрамиз.

Бир нарса аниқки, биз унга қўлимиздан келганча ёрдам берамиз, - деди Мареска.