Холанд ва Мбаппе ҳеч қачон бирга ўйнолмайди

Англия терма жамоаси, АПЛнинг бир қатор клублари ва мадридлик «Реал» таркибида ўйнаган собиқ ҳужумчи Майкл Оуэн норвегиялик форвард Эрлинг Холанднинг келажаги «Манчестер Сити» билан боғлиқ бўлиб қолишини тахмин қилмоқда. Унга кўра, «Реал»нинг қизиқишига қарамасдан, бу трансфер амалга ошмаслиги мумкин.

- Холанд «Реал»га ўтиши мумкинми? Ҳозирча уларда Мбаппе бор экан, менимча, клуб яна шунчалик катта маблағ сарфламайди. Аллақачон Вини Жуниор ва Мбаппе бир жамоада қай даражада мослашиши мумкинлиги борасида шубҳалар бор. Мбаппе кўпроқ чап томонга силжиб ўйнашни ёқтиради, шу боис саволлар туғилаяпти. Агар гап Мбаппе ва Холанд ҳақида кетса, иккаласини бир вақтнинг ўзида қай тарзда жамоага жойлаш мумкин? Мбаппени чап қанотга қўйиш керакми?

Ростини айтсам, бу ерда кимнидир танлашга тўғри келади, деб ўйлайман. Шахсан мен дунёдаги, эҳтимол, энг кучли икки марказий ҳужумчи — Мбаппе ва Холанд — бир жамоада бир вақтнинг ўзида майдонга тушишига ишонмайман.

Бу ерда ҳам нарх масаласи бор, ҳам бу тизимни умуман қандай ишлатиш мумкинлиги савол остида... Эҳтимол, бундай трансфер учун аввал Мбаппе жамоани тарк этиши керак бўлар. Мен ўйнаган даврда клуб аллақачон «Галактикос» стратегиясини синаб кўрган — фақат катта юлдузларни жамлаш ҳар доим ҳам кутилган натижани бермайди, — дея Оуэннинг сўзларини келтиради Tribal Football.

Эрлинг Холанд «Манчестер Сити» сафида 198 ўйинда 162 та гол урган. Форварднинг клуб билан амалдаги шартномаси 2034 йилгача мўлжалланган. Transfermarkt маълумотларига кўра, норвегиялик ҳужумчи 220 миллион еврога баҳоланмоқда.