Мен борман-ку, Родри нега керак?

«Барселона» ярим ҳимоячиси Френки де Йонг клубнинг «Манчестер Сити» хавбеки Родри билан шартнома имзолаш қароридан ҳайратда қолгани айтилмоқда. Нидерландия терма жамоаси аъзоси жаҳон чемпиони келганидан сўнг асосий таркибдаги ўрнига хавф туғилиши мумкинлигидан хавотирда, деб ёзади The Touchline ижтимоий тармоқдаги саҳифасида.

Де Йонг ҳозирча майдонга қайта олмаяпти — у 2026 йилги жаҳон чемпионатида олган жароҳатидан тикланмоқда. Турнир давомида футболчи ўнг тиззасидаги боғламни узиб олган. Жарроҳлик амалиёти талаб этилмаган бўлса-да, у 2026/2027 йилги мавсум бошини ўтказиб юбориши аниқ. «Барселона» Ла Лига чемпиони унвонини ҳимоя қилишни 23 август куни сафарда «Эльче»га қарши ўйин билан бошлайди.

Испания оммавий ахборот воситалари маълумотига кўра, «Манчестер Сити»дан Родрини сотиб олиш бўйича келишув якуний босқичга кирган. Трансфер қиймати тахминан 50 миллион еврони ташкил этмоқда. 2024 йилги «Олтин тўп» соҳиби ва 2026 йилги жаҳон чемпионатида энг яхши ўйинчи деб топилган Родри «Барселона»ни танлаб, Мадриднинг «Реал» клуби таклифларини рад этган.

Ҳозирча Родри ҳам майдонга тушмаяпти: жаҳон чемпионатидан сўнг у белида кичик жарроҳлик амалиётини ўтказди ва фақат август ойи охирида сафга қайтиши кутилмоқда. Transfermarkt портали баҳосига кўра, футболчининг бозор қиймати 55 миллион евро атрофида.