Никони қўрқитган муаммо ҳал бўлди

“Атлетик Бильбао” юлдузи Нико Уильямснинг “Валенсия”га қарши ўйинда олган жароҳатидан кейин ўтказилган текширувлар натижасига кўра, футболчига жуда яхши хабарлар келди.

Дастлабки хавотирларга кўра, Нико яқинлашиб келаётган жаҳон чемпионатини ўтказиб юбориши мумкин эди. Бироқ тиббий текширувлар унинг Шимолий Америкада бўлиб ўтадиган мусобақагача сафга қайтишини тасдиқлади.

Уильямс душанба куни эрталаб текширувдан ўтди ва унинг сон орти мушакларида жиддий жароҳат йўқлиги маълум бўлди. Энг муҳими, пай қисми жиддий шикастланмагани тасдиқланди. Айнан шу ҳолат клуб шифокорлари ҳамда миллий жамоа мураббийлар штаби учун асосий ташвиш эди. Чунки футболчи “Сан-Мамес” стадионидаги Ла Лига баҳсида биринчи бўлимдаёқ майдонни тарк этган эди.

Марса нашри хабарига кўра, футболчининг тикланиш муддати тахминан уч ҳафтани ташкил қилади. Бу Испания терма жамоаси бош мураббийи Луис де ла Фуэнте учун катта янгилик бўлди. Чунки “Евро-2024” финалининг энг яхши футболчиси жаҳон чемпионати учун якуний таркиб шакллантирилгунга қадар тайёр бўлиши кутилмокда.

Ижобий тикланиш режасига кўра, Уильямс назарий жиҳатдан 15 июнь куни Кабо-Вердега қарши бўлиб ўтадиган жаҳон чемпионати очилиш ўйинига тайёр бўлади. У 4 июнь куни Ироққа қарши ўртоқлик учрашувини ўтказиб юбориши мумкин, аммо АҚШдаги йиғинда жамоага қўшилиши кутилмоқда.

Маълумотларга кўра, Луис де ла Фуэнте футболчи тикланиши учун керак бўлса, ҳатто гуруҳ босқичидаги дастлабки икки ўйинни ҳам кутишга тайёр эди. Энди эса бундай эҳтиёткор чораларга эҳтиёж қолмаслиги мумкин.

Шунга қарамай, мураббийлар штаби очилиш ўйини рақибининг имкониятларини инобатга олиб, Уильямсни эҳтиёткорлик билан майдонга қайтариши мумкин. Аммо унинг мусобақа бошиданоқ АҚШдаги йиғинда жамоа билан бирга бўлиши бир кун аввалгача деярли имконсиздек туюлаётган эди.