Нодирбек Абдусатторов: "FIDE ва ​​"Freestyle Chess" ҳамкорлик қилиши керак!"

Мукофот жамғармаси 75000 минг долларни ташкил этувчи "2025 Freestyle Chess Grand Slam Weissenhaus" турнири давом этмоқда. Ушбу турнирда Нодирбек Абдусатторов ҳамда Жавоҳир Синдаров дунёнинг энг кучли шахматчилари билан баҳсларга киришган. Нодирбек Абдусатторов мусобақадан кутилмалари, FIDE ва "Freestyle Chess" муносабатлари ҳақида ўз фикрлари билан ўртоқлашди.

Салом, Нодирбек! Сиз бир йилдан кейин Вайсенхаусга қайтдингиз. Ҳиссиётлар қандай?

Салом! Мен ўзимни ажойиб ҳис қиляпман ва Германияга келганимдан доимгидек хурсандман. Ўтган йили бу ерда яхши ўйин кўрсатган эдим. Бу сафар ҳам натижаларимни яхшилашга ҳаракат қиламан.

Турнир таркиби жуда кучли кўринмоқда: Магнус, Ҳикару, Фабиано, Гукеш, сиз... Бу сиз иштирок этган энг нуфузли турнирлардан бирими?

Ҳа, балки бу менинг фаолиятимдаги энг кучли турнирдир. Аммо, афсуски, бу классик эмас. Мен классик форматни афзал кўраман, лекин бу ерда биринчи навбатда тезкорлик талаб қилинади. Осон бўлмаслиги аниқ,  лекин қизиқарли партиялар кутяпман. Ўтган йили турнир жуда қизиқарли ўтди: Тезкор  ғалаба қозондим, чорак финалда Динг Лиренни мағлуб этдим, ярим финалда эса Магнусга ютқаздим. Бу мен учун муваффақиятли турнир бўлди ва энди менда натижани яхшилаш учун мотивация бор.

Ўтган йили сиз Рустам Қосимжонов билан Вейк-ан-Зееда бўлгансиз. Бу сафар ким билан келдингиз?

Мен бу ерга онам билан келганман.

Ушбу турнирга қандай тайёргарлик кўрдингиз?

Ростини айтсам, ҳеч қандай. Бундай турнирга қандай тайёргарлик кўриш мумкин? Мен тактик муаммоларни ҳал қилдим, вариантларни ҳисоблаш устида ишладим - бу ҳар қандай турнирга стандарт тайёргарлик.

Лекин баъзи ўйинчилар ўтган партияларни томоша қилдилар ёки бошланғич позицияларни таҳлил қилишди...

Бу кичик устунлик бериши мумкин, лекин буни буни амалга ошириш кераклигига ишончим комил эмас. Тажрибага эга бўлганим сайин бундай турли-туман турнирларга тайёргарлик методикамни топаман деб ўйлайман.

Бу йилги тақвимингиз жуда зич. Бу турнир сиз учун қанчалик муҳим?

Жуда муҳим. Мақсадларимдан бири Париждаги турнирнинг кейинги босқичига йўлланмани қўлга киритиш. Умуман олганда, 2025 йил, айниқса, жаҳон чемпионати циклининг бир қисми бўлган Grand Suisse ва Жаҳон кубоги билан банд бўламан. Ушбу турнирларга тайёргарлик ва эркин шахматда иштирок этишни бирлаштириш керак бўлади. Ҳа, тақвим барча ўйинчилар учун оғир бўлади, аммо бу бизнинг вазифамиз ва биз буни уддалашимиз керак. Келинг, ҳаммаси қандай бўлишини кўриб чиқайлик.

Ушбу турнир олдидан жуда кўп тортишув ва можаролар бўлган. Вазиятни кузатдингизми?

Ҳа, музокаралар анчадан бери давом этаётганини, айниқса, турнир олдидаги сўнгги кунлар жуда кескин ўтганини билардим. Тафсилотини ҳам билмасдим, лекин эшитдимки, томонлар ўзаро мактуб алмашган, вазият мураккаб эди.

Бунга қандай муносабатдасиз?

FIDE ва ​​"Freestyle Chess" ҳамкорлик қилиши керак, деб ҳисоблайман. Мен бўлинишга қаршиман ва ўйинчилар иккала ташкилотда ҳам иштирок этиш имкониятига эга бўлиши яхшироқ деб ўйлайман. Бу нафақат шахматчилар, балки томошабинлар учун ҳам кўпроқ имкониятларни тақдим этади.

FIDE бу йил ўйинчиларга "Freestyle Chess"да қатнашишга рухсат берди, аммо кейин нима бўлади?

Ҳозирча улар рухсат беришди, аммо кейинги йил нима бўлиши номаълум. Менимча, қандайдир қарор қабул қилинади. Вазиятни кузатиб борамиз", - деди Абдусатторов.