Нўъмон Ҳасанов: Осиё Чемпионлар лигаси йўлланмасини Кубок орқали қўлга киритишга ҳаракат қиламиз

Coca Cola Cуперлиганинг 26-тур доирасидаги  “Қўқон-1912” – “Навбаҳор” (1:1) учрашувидан кейинги матбуот анжуманининг биринчи қисмида “Навбаҳор” жамоаси устози Нўъмон Ҳасанов иштирок этди.

-  Авваламбор, футболчиларни чемпионатни якунлангани билан табриклайман. Бугунги ўйин шиддатли тарзда кечди. Мухлислар иккита чиройли гол гувоҳига айланишди. Майдон ҳолати ҳам қиш бўлишига қарамай, чиройли ўйнин кўрсатиш имкониятини берди. Футболчилар маза қилиб пас орқали тўп сурдилар. Мавсум давомида хатоларимиз бўлди. Камчиликларимиз  устида ишлаймиз.

Жамоамиз олдига Чемпионлар лигасига чиқиш вазифаси қўйилган. Кубок ўйини орқали йўлланмани қўлга киритишга ҳаракат қиламиз. Кубок баҳслари бу йил жуда қисқа фурсатда ўтказилади. Бунинг устига финал Наманганда бўлади. ОЧЛ вазифаси мен жамоага келмасимдан олдиноқ қўйилган эди.

Янги мавсумда ҳам жамоада қоладиган бўлсам, таркибни кучайтиришга ҳаракат қиламиз. Бирданига ҳамма нарсани ўзгартириш қийин. Менга имкон берилса қишки танаффус вақтида жамоа ўйинини янада кучайтириш учун бор имкониятимни ишга соламан, - деди Ҳасанов.