Ўзбекистонлик жаҳон чемпиони АҚШга кўчиб ўтди

Ўзбекистон миллий терма жамоасининг етакчи боксчиларидан бири, ёш истеъдод Жавоҳир Умматалиев ҳозирда АҚШда машғулотлар ўтказмоқда, деб хабар бермоқда  Boxing Media нашри. 

Британияда жойлашган спорт сайтининг инстаграм саҳифасида эълон қилинган видеода ўзбекистонлик ёш боксчи Америка спорт залларидан бирида жисмоний ҳолатини фаол равишда яхшилаётгани ва навбатдаги жангларга пухта ҳозирлик кўраётгани акс этган.

«Ҳаваскор бокс юлдузи Жавоҳир Умматалиев ҳозирда АҚШда машғулот олиб бормоқда», — дея таъкидланади нашр изоҳида.

21 ёшли Умматалиев 2025 йилда World Boxing жаҳон чемпиони бўлган, шунингдек, Хитойда ўтказилган Жаҳон кубоги мусобақасида олтин медални қўлга киритган. Ушбу турнир финалида у қозоғистонлик Сабиржан Акқалиқов устидан баҳсли ҳакамлар қарорига кўра ғалаба қозонган эди.

Жавоҳир шу пайтгача профессионал рингда ҳам ўзини намойиш этишга улгурди. 2025 йил 28 ноябр куни Челябинск шаҳрида (Россия) у озарбайжонлик Роҳим Алиевни мағлуб этди. Иккинчи жангини эса 9 май куни Манчестерда (Англия) ўтказиб, «Co-Op Live Arena» мажмуасида поляк Дамиан Драбикни нокаутга учратди. Ўзбекистонлик боксчи бунинг олдидан Британиянинг машҳур промоутерлик компанияси Queensberry Promotions билан, унинг раҳбари таниқли Фрэнк Уоррен билан шартнома имзолаган эди.

АҚШга йўл олишидан аввал Умматалиев Тошкентда яшаб, Ўзбекистон бокс терма жамоаси таркибида машғулотлар олиб борган. У ерда у мамлакатнинг таниқли мутахассиси Акмал Ҳасанов қўл остида тайёргарлик кўрган.