Одил Аҳмедов билан чемпион бўлган юлдуз кутилмаганда футболдан кетадиган бўлди

Ўзбек футболининг энг ёрқин ўйинчиларидан ҳисобланган Одил Аҳмедов билан Хитойнинг “Шанхай СИПГ” жамоасида чемпионликни қўлга киритган бразилиялик футболчи Оскар фаолиятини 34 ёшида якунлашга қарор қилди.

Оскар Хитойдаги фаолиятини якунлаб, 2025 йилнинг январида ўз юртига қайтган ва “Сан-Паулу” билан 2027 йилнинг охиригача давом этадиган шартнома имзолаган эди.

Бу ҳақда ESPN Brasil нашрининг хабар беришича, Оскар юрагида боғлиқ муаммолар пайдо бўлгач, профессионал футболчилик фаолиятини якунлашни маъқул топди.

Манбага кўра, “Сан-Паулу” футболчининг келажак режаларини аниқлаш учун у билан учрашув ўтказмоқчи. Оскарни клуб тизимида ишга жалб қилиш варианти ҳам кўриб чиқилмоқда. Клуб ярим ҳимоячи учун қарор қабул қилиш бўйича муддат белгиламаган, у қанча керак бўлса, шунча вақт ўйлаб кўриши мумкин.

Эслатиб ўтамиз, 11 ноябрь куни футболчи машғулот базасида режали тиббий кўрик пайтида ҳушини йўқотган ва шундан сўнг унда юрак билан боғлиқ муаммолар борлиги аниқланган.

Оскар “Сан-Паулу” тарбияланувчиси ҳисобланади. Бразилияда “Интернасьонал” жамоаси шарафини ҳам ҳимоя қилган.

2012 йили “Челси” уни 32 миллион евро эвазига ўз таркибига қўшиб олган эди. 2017 йили Оскар айни кучга тўлган пайтда Европани тарк этиб, Хитой чемпионатига йўл олгани кескин танқидларга сабаб бўлди.

Ўшанда Хитой футболи раҳбарияти катта маблағлар эвазига Европанинг энг кучли ўйинчиларини миллий чемпионатга жалб қилишга эътибор қаратган эди. Ўша даврда Одил Аҳмедов ҳам Россия Премьер-лигасини тарк этиб, бразилиялик машҳур юлдузлар – Оскар ва Халк каби “Шанхай СИПГ” билан шартнома тузган.

Бу футболчилар 2018 йили жамоанинг Хитой чемпиони бўлишида жуда катта ҳисса қўшган эди. Бундан ташқари, “Шанхай” бу чарм тўп усталари ёрдамида кумуш ва бронза медалларга ҳам эга чиққан.

Ўзбекистонда Роналдуни тўхтатадиган бир футболчи бор

Хориж клубларига Ўзбекистондан футболчи олишни тавсия қилишди

Ўзбекистон улкан ҳурматга лойиқ! Португалия устози Мартинес яна нималар деди?

Бу хатодан кейин Гвардиола Ҳусановни асосий таркибга қайтариши шарт