ОФК кубоги. "Сўғдиёна" бугун малайзиялик "шаҳар йигитлари"га қарши майдонга чиқади (батафсил маълумот)

Жиззахнинг "Сўғдиёна" клуби ОФК кубоги ҳудудлараро финал босқичида Малайзиянинг “Куала-Лумпур Сити" жамоасига қарши майдонга тушади. Ушбу ўйиндаги ғалаба икки жамоа учун ҳам ўта муҳим.

Биз "бўрилар" ҳақида етарлича маълумотга эгамиз. Унинг тарихи, ўтмишда қайд этган натижалари, ҳозирги даражаси, ўйин услуби ва шу каби нарсалардан яхшигина хабардормиз. Бироқ рақиб "Куала-Лумпур Сити" ҳақида нималарни биламиз? Бу клуб ички ва халқаро майдонда қандай мавқега эга? Таркибда қандай футболчилар ҳаракатланади? Клубнинг тарихи ҳақида қандай маълумотлар бор? Шу ҳақда SPORTS.uz мухбири Шоҳрух Зоиров қуйида батафсил тўхталиб ўтади.

Клуб тарихи.

"Куала-Лумпур Сити" жамоасига 1974 йилда асос солинган. Дастлаб клуб номи "Куала-Лумпур ФА" бўлган. Кейинчалик "Куала-Лумпур Юнайтед" каби атаб келинган. Ҳозирги номини жамоа 2021 йилда олган.

Рақибларимиз 2 марта мамлакат ғолиби, 4 карра кубок соҳиби ва яна 2 марта ФА кубогида зафар қучган. Шунингдек, улар 2 маротаба Осиё чемпионлар лигасида ҳам иштирок этган. 

2012 йилда жамоа қуйи дивизионга тушиб кетган. Келаси йил эса ўз тарихида илк маротаба янада пастки чемпионатга равона бўлган. Клубнинг асосий рақиби "Селангор" жамоаси ҳисобланади. Улар ўртасидаги ўйин "Кланг водий дербиси" деб аталади.  

Рақибимиз "Kuala Lumpur Stadium" ўйингоҳида ўз уй учрашувларини ўтказади. Ушбу стадион ўз бағрига 18 минг томошабинни сиғдира олади.

Ҳозирги ҳолати.

"Шаҳар йигитлари" (клуб лақаби) айни пайт Малайзия чемпионатида 12 жамоа ичида 5-ўринда кетмоқда. Клуб ўтказилган 20 баҳсда 8 ғалаба, 5 дуранг ва 7 мағлубият қайд этган. Очколар сони 29 тани ташкил этади, тўплар нисбати - 29:28. Рақибнинг 12 та жамоа ичида 5-поғонада экани биз учун қувонарли бўлиши мумкин. Аммо улар бор эътиборини битта ўйинга қаратса, "Сўғдиёна"га етарлича муаммо туғдириши мумкин.

ОФК кубогида "Куала-Лумпур Сити" шу пайтгача 5 та ўйин ўтказди. Гуруҳ босқичида биттадан ғалаба ва дуранг. Плей-офф илк ўйинида пенальтилар сериясига кўра зафар қучган. Сўнг Индонезиянинг "Макассар" жамоасини 5:2 ҳисобида, охирги ўйинда эса Ҳиндистоннинг "Мохун Баган" клубини 3:1 ҳисобида таслим этган. 

Раҳбарият, мураббий ва футболчилар ҳақида.

Ушбу клуб раҳбари Шаҳидан Кассим ҳисобланади. Спорт директори лавозимида Боян Ходак иш олиб боради. Шунингдек, у бош мураббий ҳам саналади. 

Боян 2006 йилдан мураббийлик фаолиятини бошлаган. У асосан, Малайзияда мураббийлик қилиб борган. 2017-2019 йиллар оралиғида Малайзия U-19 терма жамоасига устозлик қилган. Умумий ҳисобда мутахассис 309 беллашувларда 165 ғалаба, 75 дуранг ва 69 мағлубият қайд этган. Статистика унинг 53,40 фоиз учрашувларида зафар қучганини кўрсатмоқда.

Табиийки, жамоа футболчиларининг кўпи Малайзиядан. Аммо легионерлар ҳам йўқ эмас. "Шаҳар йигитлари" сафида 5 нафар легионер тўп тепади. Улар дарвозабон Кевин Рэй Мендоза (Филиппин), ярим ҳимоячи Пауло Жозе (Бразилия) ҳамда ҳужумчилар Ромель Моралес (Колумбия) ва Кевин Кубемба (Конго). Бразилиялик легионер жамоанинг энг хавфли вакили ва шу билан бирга, жамоа сардори ҳамдир.

Ушбу ўйин осон ўтмаслиги аниқ. Нима бўлганда ҳам биз "Сўғдиёна"га муваффақият тилаб қоламиз. Ҳалқаро майдонда ҳар бир клубимизнинг ютуғи биз учун ўзгача қадрга эга.

Шоҳрух Зоиров тайёрлади.