ОКМК бош директори: Ҳозирдан телефонимизга қўнғироқлар, СМСлар келишни бошлади

Бугун Осиё Чемпионлар лигасининг янги 2023/2024 йилги мавсумига қуръа ташланганидан хабарингиз бор. Ушбу маросимдан сўнг Ўзбекистон жамоалари ўзларининг гуруҳ босқичидаги рақиблари номини билиб олишди. ОКМК жамоаси бош директори Баҳодир Мирзаев қуръа ташлаш маросимида бевосита иштирок этди ва бу ҳақда ўз фикрларини билдириб ўтди.

-Жамоамиз ўтиш ўйинида Қатарнинг “Ал-Араби” клубини мағлубиятга учратиб гуруҳ босқичига йўлланмани қўлга киритди. Бу ўзбек футболи мухлислари учун жуда катта байрам деб ўйлайман. Айниқса, бугунги қуръа ташлаш маросимидан сўнг маълум бўлдики, жамоамиз Саудия Арабистонининг “Ал-Иттиҳод” клуби билан бир гуруҳдан жой олди. Маълумки, ушбу жамоа сафида ҳозирда бир қатор юлдуз футболчилар тўп суради. Улардан энг машҳури Карим Бензема. Ҳозирдан телефонимизга қўнғироқлар, СМСлар келишни бошлади. Шундан ҳам бўлажак ўйинни қандай кечишини билиб олса бўлади.

Умуман олганда ушбу қуъра ОКМК жамоаси учун жуда муваффақиятли бўлди деб ўйлайман. Бу гуруҳда жамоамиз бемалол рақобатлаша олади ва кейинги босқичга чиқади деб умид қиламан.

Эслатиб ўтамиз, олмалиқликлар гуруҳ босқичида “Ал-Иттиҳод” (Саудия Арабистони), “Аир Форс” (Ироқ) ва “Сепахон” (Эрон) клубларига қарши баҳс олиб боради.