"Олтин тўп" учун даъвогарлар рейтинги янгиланди

Дунё футболида энг нуфузли шахсий совринлардан бири саналадиган «Олтин тўп» учун кураш тобора қизимоқда. Жаҳон чемпионати ярим финал босқичидан сўнг Goal портали 2026 йилги «Олтин тўп» учун асосий даъвогарлар рўйхатини янгилади.

Рейтингда ҳозирча «Бавария» ва Англия терма жамоаси ҳужумчиси Ҳарри Кейн пешқадамликни сақлаб қолди. Бироқ англияликларнинг ярим финалда мусобақани тарк этиши унга бўлган ишончни сезиларли даражада пасайтирди. Шу боис Кейнинг позицияси аввалгидек мустаҳкам эмас, деган фикрлар кўпаймоқда.

Янгиланган рўйхатда Аргентина терма жамоаси сардори Лионель Месси иккинчи ўринга кўтарилди. У жамоаси билан жаҳон чемпионати финалигача етиб бориш имкониятини сақлаб қолган, шу билан бирга мусобақа тўпурарлари баҳсида ҳам етакчилар қаторида бормоқда. Мана шу омиллар Мессининг «Олтин тўп» учун имкониятларини янада оширди.

Учинчи поғонада «Барселона» ва Испания терма жамоаси ярим ҳимоячиси Ламин Ямал жой олган. Испания ва Аргентина ўртасидаги жаҳон чемпионати финал баҳси мазкур нуфузли соврин учун курашда кучлар нисбатига жиддий таъсир кўрсатиши кутилмоқда. Финалдаги индивидуал ўйин ва ҳал қилувчи голлар кейинги баҳолашда муҳим омилга айланиши мумкин.

«Олтин тўп»ни топшириш маросими 26 октябрь куни Лондон шаҳрида бўлиб ўтади.