Ортимизга яшинманг! “Барса” хўжайини “Реал”га зарба берди

“Барселона” президенти Жоан Лапорта Мадриднинг “Реал” клуби раҳбари Флорентино Переснинг баёнотларига муносабат билдирди. Аввалроқ Перес “Барселона” ва ҳакамлар техник қўмитаси собиқ вице-президенти Хосе Мария Негрейра ўртасидаги ҳамкорликда коррупция элементлар борлигини таъкидлаганди.

- Негрейра иши билан боғлиқ ҳамма нарса – аслида умуман мавжуд бўлмаган иш, шунчаки ёлғон. Менимча, улар бу орқали одамларни чалғитиш ва икки йилдан бери ҳеч нарса ютмаганини яширишга уринмоқда. Улар ўз муваффақиятсизликларини яшириш учун “Барселона”дан фойдаланмоқда. Клуб бу баёнотларга тегишли орган орқали жавоб бериш учун ҳали ҳам ўрганиш ишларини олиб бормоқда.

Улар жуда кўп маблағ сарфлашди, аммо ҳалигача ҳеч нарса юта олишмади. Биз эса ғалаба қозонишда давом этмоқдамиз.

Биз кетма-кет икки чемпионлик, икки Суперкубок ва Испания кубогини қўлга киритдик, -деди Лапорта Mundo Deportivo нашрига.

Эслатиб ўтамиз, 2023 йилда “Барселона”га ҳакамлар техник қўмитаси собиқ вице-президенти Хосе Мария Негрейрага тўланган маблағлар бўйича пора бериш айблови қўйилган эди. Каталония клуби 2001 йилдан 2018 йилгача бўлган даврда тахминан 8,4 миллион евро миқдорида тўловларни амалга оширганликда айбланган.