O‘runovga braziliyalik raqobatchi keladi

“Spartak” rahbariyati yarim himoya chizig‘ini kuchaytirish maqsadida Daniyaning “Midtyullann” klubi safida o‘ynayotgan braziliyalik Evanderni o‘z safiga qo‘shib olmoqchi.

Ayni paytda moskvaliklar 22 yoshli yarim himoyachining vakillari bilan muzokara olib borayotgani aytilmoqda.

O‘tgan mavsumda Evander Daniya chempionatida 30 ta uchrashuvda maydonga tushib, 8 ta gol va 9 ta golli pas muallifi bo‘ldi. Iste’dodli futbolchi o‘zining ishonchli o‘yini bilan “Midtyullann”ning tarixda ilk bor Evropa Chempionlar ligasiga yo‘llanma olishga munosib hissa qo‘shdi.

Sir emaski, bugungi kunda “Spartak”da aynan yarim himoya chizig‘ida raqobat juda kuchli. Hozir jami 9 nafar yarim himoyachi asosiy tarkibga kirish uchun kurashmoqda. Ular orasida hamyurtimiz Oston O‘runov ham bor. 19 yoshli futbolchimiz  o‘tgan chempionatda "Ufa"ning etakchi o‘yinchisi sifatida to‘p surgan edi. "Spartak" jamoasiga o‘tganidan keyin Oston hali boshlang‘ich tarkibga kira olgani yo‘q. O‘zbekistonlik futbolchi premer-liga o‘yinlarida faqat zaxiradan maydonga tushmoqda.