Ўруновнинг қадри билиняпти

Россия премьер-лигасининг янги мавсумида “Уфа” бешта учрашувдан тўрттасида очко йўқотди. Ўтган мавсумда қудратли жамоалар билан тенгма-тенг курашган уфаликлар бу сафар рақибларга имкониятни бой бермоқда.

Бош мураббийи Вадим Евсеев муваффақиятсизликларни янги мавсум олдидан жамоани етакчи футболчилар тарк этгани ва уларнинг ўрни муносиб ўйинчилар билан тўлдирилмагани билан боғлади.

- Бизга футболчи етишмаяпти. Агар ўйинлар ҳафталик циклда ўтказилганида бунчалар муаммо чиқмас эди. Ҳозир кўп ўйин ўтказиляпти ва бизда яхши футболчилар танқислиги вужудга келди, - деди Вадим Евсеев.

Ўтган мавсумнинг иккинчи ярмида “Уфа” етакчисига айланган ўзбек легионери Остон Ўрунов ҳам Москванинг “Спартак” жамоасига ўтиб кетган эди. Гарчи москваликлар бош директори Шамиль Газизов унинг жисмоний ҳолати ўйинга тайёрлигини билдирган бўлса-да, мураббийлар штаби Остонни майдонга туширгани йўқ. У уч турдан бери захирада ўтириб, дебютини кутмоқда.

“Уфа”ни Остон Ўруновдан ташқари, Даниил Фомин, Эмека Игбун, Андрей Козлов, Артём Голубев, Александр Пуцко каби асосий таркиб ўйинчилари тарк этди.