Отабек Нарзуллаев: "Меҳмондаги дуранг биз учун яхши натижа"

Суперлиганинг 22-турига старт берилди. Унинг илк беллашуви Термизда “Сурхон” ҳамда “Машъал” клублари ўртасида бўлиб ўтди. Муросасиз тарзда ўтган ўйинда ҳисоб очилмади - 0:0. Учрашув якунлангач, “Машъал” бош мураббийи Отабек Нарзуллаев матбуот анжуманида қатнашди.

- Аввало, учрашув ҳақида тўхталиб ўтсангиз.

- Ўйин қийин бўлишини билардик. “Сурхон” яхши жамоа. Шунга яраша тайёргарлик кўрдик. Худога шукр, бир очко ҳам бу очко. Шунақа бўлдики, ким биринчи гол урса ўша жамоа ютадиган ўйин бўлди. Томошабоп, жанговар, яхши ўйин бўлди. Футболчиларимга раҳмат айтаман. Улар ғалабага иштиёқ билан охиригача курашишди.  Ютишимиз ҳам, ютқазишимиз ҳам мумкин эди. Дуранг адолатли натижа бўлди, деб ўйлайман.  

- "Сурхон"ни қанчалик ўргангандингиз?

- “Сурхон”ни ёш жамоа эканини билардик. Шунга яраша футболчиларимизни уларга яқинроқ ўйнашларини тайинлагандик. Агар рақиб ўйинчиларига масофа учун бўш ҳудуд қолдирсак тезликда олдинга ўтиб кетишлари мумкин эди. Йигитларимиз биз айтган техник-тактик кўрсатмаларни аъло даражада бажаришди. Меҳмонда қайд этилган дуранг биз учун яхши натижа.

-  Қайдномага айрим футболчилар киритилмади...

- Бизда йўқотишлар бор. Алиқулов, Музаффаров, Абдуалимов...Яхши футболчиларимизни йўқлиги анча билинди. Захира ўриндиғимизга U21 дан ёшларни олганмиз. Улар ҳам аста-секин асосий таркибга кўникиб боришяпти. Кейинги учрашувларга ҳам жалб қиламиз.

- Иккинчи бўлим бошида майдонга марказий ҳимоячи туширилди. Биринчи бўлимдан кейин сизда бошқа режа ҳам бор эди. Бу ўзгаришдан мақсад нима эди?

- Танаффусдан кейин таҳлил қилдик ва қанотимизни янада мустаҳкамламоқчи бўлдик. “Сурхон” асосан чап қанотдан ҳужумлар уюштирди. Ушбу қанотни зарарсизлантиришга ҳаракат қилдик. Шаҳбоз Жўраев ва Ислом Баратовни тушириб, ўша қанотимизни кучайтирдик. Улар бизга ёрдам беришди.