O‘zbek futbolining 110 yilligi. O‘FA rahbariyati va Navoiy viloyat hokimi ishtirokida matbuot anjumani bo‘lib o‘tdi

O‘zbek futbolining 110 yilligi munosabati bilan Navoiy viloyatida bayram tadbiri davom etmoqda. Biroz avval O‘FA rahbariyati va viloyat hokimi o‘rtasida matbuot anjumani bo‘lib o‘tdi. 

Unda dastlab Navoiy viloyat hokimi Normat Tursunov so‘zga chiqib, viloyatda futbolni yanada rivojlantirish, bu yo‘lda yaratilayotgan sharoitlar haqida to‘xtalib o‘tdi. 

So‘ngra O‘FA birinchi vitse-prezidenti Ravshan Ermatov so‘zga chiqdi. U Navoiy viloyati mamlakatimizda futbol rivojlangan hududlardan ekanini tilga oldi va Navoiyda futbolni yanada rivojlantirish yo‘lida doimo hamkorlikda ishlashga tayyorligini ma’lum qildi. 

Uchrashuv so‘nggida Navoiy viloyat hokimi Normat Tursunov va "Navoiy kon-metallurgiya kombinati" aksiyadorlik jamiyati boshqaruv raisi Quvondiq Sanaqulovga "O‘zbekiston futboli rivojiga qo‘shgan hissasi uchun" ko‘krak nishoni topshirildi. Yana bir qator faxriy hamda mutasaddilar esdalik sovg‘alarini qabul qilib oldi.