Ўзбек-қозоқ боксидаги яна бир эпоха ўз поёнига етди ёхуд Камшыбек, ажойиб рақобат учун сенга раҳмат!

Футболда "эл-класико" ва "Милан дербиси" жуда машҳур ва мухлислар ушбу қарама-қаршиликни интиқлик билан кутишади. Чунки улар футболни санъат даражасига чиқариб юборади, десак муболаға бўлмайди. Тўғри, сўнги вақтларда "Милан дербиси"га бўлган қизиқиш бироз сусайган бўлса-да, лекин "Милан" ва "Интер"нинг шонли даврида бутун жаҳон футбол ихлосмандлари иккига бўлинганлиги рост. "Барселона" ва "Реал" қарама-қаршилиги эса ортиқча изоҳга муҳтож эмас...

Аслида бугун мен футбол ҳақида эмас, юқорида айтиб ўтган футбол оламидаги ҳар икки атамага мос келувчи ҳаваскор боксдаги қарама-қаршиликка эътибор қаратмоқчиман. Яъни, ҳаваскор боксдаги "эл-класико" ёхуд "Марказий Осиё дербиси" борасида...Ҳа, англаб турганиздек, Ўзбекистон ва Қозоғистон боксидаги рақобат ҳақида сўз кетмоқда. 
Собиқ Иттифоқ парчаланганидан сўнг, Олимпиада, Жаҳон чемпионати ва Қитъа чемпионатларида Ўзбекистон ва қозоғистонлик боксчилар ҳар доим совринли ўринларни қўлга киритиб келишган. Даставвал минтақада қозоғистонлик чармқўлқоп усталари Олимпиадада анчагина салмоқли натижалар қайд этди.  Сўнги 10 йилликда эса Ўзбекистон терма жамоаси нафақат минтақада балки жаҳонда тенгсиз эканликларини исботлаб келишмоқда. Қувонарлиси, ҳар доим "улоқ"ни олиб кетадиган Куба, Россия ва украиналик боксчиларни Ўзбекистон ҳамда Қозоғистон боксчилари ортда қолдира олди. 

Албатта, ҳар икки юртнинг бокс мамлакатига айланишининг сабаби ўзаро соғлом рақобат эканлиги сир эмас. Шунча босиб ўтилган йиллар мобайнида халқаро мусобақаларда кўплаб ўзбек-қозоқ боксчиларининг тўқнашувига гувоҳ бўлганмиз. Улар орасида эса Баҳодир Жалолов-Камшыбек Кункабаев қарама-қаршилиги эса алоҳида тарих! Ҳа, буларга қадар, Наримон Отаев-Нуржан Сманов, Рустам Саидов- Мухтархон Дилдабеков, Элшод Расулов-Адилбек Ниязимбетовларнинг муросасиз жангларига гувоҳ бўлганмиз. Бироқ, Жалолов-Кункабаев даври узоқ давом этди. Ўзаро натижа 7:3 кўриниш олди. Албатта, Жалолов фойдасига! Шунингдек Лазизбек Муллажонов ҳам бир бора устун келганди. Бироқ, бу ерда биз натижага урғу қаратмоқчи эмасмиз. Шунчаки Камшыбек Кункабаевнинг фаолиятини якунлаганини беэътибор қолдира олмадик. Зеро, Баҳодирга у муносиб рақиб бўла олди. 

Шу ўринда қозоқ боксчисининг натижаларига эътибор қаратсак, Кункабаев фаолияти мобайнида салмоқли натижалар қайд эта олди. Олимпиада бронза медали соҳиби, икки карра Жаҳон чемпионатида кумуш, 4 карра Осиё чемпионатида кумуш, бир маротаба Осиё ўйинларида кумуш, Бутунжаҳон армия ўйинларида ҳам кумуш медални қўлга киритди. 
Ажойиб натижалар а? Гарчи, олтин бўлмаса ҳам. Ҳа, битта боксчи орзу қилиши мумкин бўлган совринлар қўлга киритилган. Аксарият финалларда у Баҳодир Жалоловдан мағлубиятга учраган. Аммо юқорида таъкидлаб ўтганимиздек муносиб жанг кўрсата олган. Шу ўринда унинг инсонийлик жиҳати ҳам мақтовга лойиқ эканлигини айтиб ўтишимиз жоиз. Камшыбек бир неча бор юртимизга ташриф буюрган ва у билан ҳамсуҳбат бўлганмиз. Қолаверса, Баҳодир Жалолов ҳамда Тўлқин Қиличевлар ҳам унинг хулқига юқори баҳо берганлигини айтиб ўтиш керак. Хуллас, биз фақат унинг яхши тарафларини эътироф этамиз. 

Қисқа қилиб айтганда, Баҳодир Жалолов ҳаваскор боксдаги фаолиятини якунлаган бўлса, Камшыбек Кункабаев расман боксдан кетганлигини маълум қилди. 
Хуллас, ўзбек-қозоқ бокси қарама -қаршилигидаги яна бир эпоха ўз поёнига етди. 

Биз эса қозоқ боксчисининг кейинги фаолиятинга омад тилаймиз. Камшыбек, ажойиб рақобат учун сенга раҳмат!

Шу ўринда баъзи қўшни юрт сайтларига ўхшаб "просмотр" учун куракда турмайдиган сарлавҳалардан фойдаланмасдан, инсонийликни биринчи ўринга қўйган ҳолда, муносиб рақибни мардларча олқишлай олсак, мухлислар ўртасида ўзаро низо қўзғамасдан, ҳар бир воқеликка холис ёндошсак ва соғлом рақобатни илгари сурсак, албатта ўзбек-қозоқ бокси янада юксалаверади! 

Аҳмадбек ЭШМАТОВ тайёрлади