Ўзбекистон кубогига саралашнинг 1-босқичи якунланди

Бугун Ўзбекистон кубогига саралашнинг 1-босқичидан ўрин олган сўнгги иккита учрашув бўлиб ўтди. 

Биринчи учрашувда Самарқанднинг “Шердор” ҳамда Самарқанд футбол академияси жамоалари куч синашди ва беллашув “Шердор”нинг 3:0 ҳисобидаги ғалабаси билан якунланди. Самарқандликлар сафида голларга Зоҳир Собиров, Акмал Козимов ва Муроджон Шамсиддинов муаллифлик қилди. 

Куннинг иккинчи учрашувида Қўқоннинг “Ҳавоканд” ва Тошкент футбол академияси жамоалари тўқнаш келди. Бу баҳснинг асосий вақти 1:1 ҳисобида якунланди ва ғолиб номи пенальтилар сериясида аниқланди. Серияда омад қўқонликларга кулиб боқди 5:4. 

Маълумот учун, биринчи учрашувда ғолиб бўлган “Шердор” жамоасига кейинги босқичда Тошкентнинг “Оқтепа” клуби рақиб бўлади. “Ҳавоканд” эса Жиззах футбол академиясига қарши майдонга тушади.