Ўзбекистон кучлими ёки Қозоғистон ёхуд терма жамоаси кучига қандай баҳо беришди?

Спорт оламида Ўзбекистон ва Қозоғистон ўртасидаги рақобат футбол майдонларига кўчган. Ўтган асрда бошланган “Пахтакор” ва “Қайрат” жамоалари ўртасидаги кимўзар пойгаси бугунги кунда терма жамоалар миқёсида давомга этмоқда.

“Setanta Sports” телеканалининг россиялик футбол шарҳловчиси Дмитрий Бажанов Ўзбекистон ва Қозоғистон терма жамоаларининг айни пайтдаги имкониятларига баҳо бериб, қайси томон кучлироқ эканини айтди.

- Мен бу терма жамоаларнинг турли жиҳатлари кучли эканини айтган бўлардим. Хусусан, ўйинни ташкил этиш ва ўз дарвозасини ҳимоя қилиш қобилияти бўйича Қозоғистон терма жамоаси устунроқ.

Бу жамоада жанговар ва жисмонан бақувват футболчилар жамланган. Айнан ҳимоя чизиғида шундай.

Қозоғистон терма жамоасининг чидамлилиги энг муҳим жиҳат. Европа чемпионати саралашида ва Миллатлар лигасида Норвегияга қарши учрашувда шундай бўлди. Бундай компонентлар бўйича Қозоғистон терма жамоаси Ўзбекистондан ўтади.

Ҳужумчилар гуруҳи, олдинги чизиқдаги ижодкорлар борасида Ўзбекистон терма жамоаси анча қизиқарли ўйнайди. Таркибда тажрибали Элдор Шомуродов, ёш истеъдод эгаси Аббосбек Файзуллаев, Эрон чемпионатида ўйнаётган ва Ўзбекистон миллий терма жамоасида жуда фойдали ўйинчи ҳисобланган Остон Ўрунов бор.

Ҳар ҳолда Ўзбекистон миллий терма жамоасида ҳужумкор футболчиларни танлаш имконияти кенгроқ.

Албатта, Ўзбекистон терма жамоаси ҳужумини Қозоғистон ҳимоячига қарши ўйини ва қайси томон кучлироқ эканини амалда кўриш жуда қизиқ бўларди, - деди Дмитрий Бажанов.

Эслатиб ўтамиз, Ўзбекистон терма жамоаси Осиё футбол конфедерацияси, қозоғистонликлар эса, УЕФА аъзоси бўлгани учун бу икки мамлакат клублари ва терма жамоалари ўзаро мунтазам тўқнаш келмайди.

Статистикаларга ихтисослашган wildstat.ru порталидаги маълумотларга қараганда, Ўзбекистон ва Қозоғистон терма жамоалари ўзаро етти маротаба тўқнаш келган.

1992 йилнинг 16 июлида  Марказий Осиё кубоги мусобақаси финал босқичи доирасида ўтказилган биринчи учрашувда қозоғистонликлар ўз майдонида 1:0 ҳисобида зафар қучган. Уч ойдан кейин Тошкентда ташкил этилган жавоб ўйинида кучлар тенг келган эди – 1:1.

1994 йили Ўзбекистон Мустақиллиги турнири финал босқичида ҳамюртларимиз қўшни мамлакат футболчилари устидан илк ғалабасини нишонлади. Ўйин тақдирини ягона гол ҳал қилди.

Қозоғистон УЕФАга ўтишидан аввал – ОФК аъзоси бўлган йиллари бу икки терма жамоа жаҳон чемпионатининг Осиё минтақаси саралаш турнирида ўзаро иккита учрашувда куч синашган. 1997 йилги иккита беллашувнинг биринчисида рақиб майдонида ҳамюртларимиз дурангга эришган – 1:1.

Тошкентдаги иккинчи беллашувда ўзбекистонлик чарм тўп усталари қозоғистонлик дарвозасига жавобсиз тўртта тўп киритган.

2007 йили Қозоғистонда ташкил қилинган “Алма-ТВ” кубоги доирасидаги ўйинда 1:1 ҳисоби қайд этилган ва шундан кейин томонларнинг алоқалари бир неча йилга узилиб қолди.

Ниҳоят, 2022 йили Тошкентда ўртоқлик учрашуви ташкил қилди. 16 ноябрда бўлиб ўтган учрашувда мезбонлар рақиб дарвозасини икки бор ишғол этди – 2:0.

Ўзбекистон миллий терма жамоаси ўзаро ўйинлардан учтасида зафар қучган ва яна учтасида дуранг ўйнаган ва фақат бир бор имкониятни бой берган.

Ҳурматли мухлислар, сиз нима деб ўйлайсиз, айни пайтда Ўзбекистон миллий терма жамоаси кучлими ёки Қозоғистон?

Фикрингизни изоҳларда қолдиринг...