Ўзбекистон Суперлигаси. "Сўғдиёна" - "Сурхон" ўйини олдидан муҳим маълумот ва статистикалар билан танишинг

Эртага 18:30 да Жиззахнинг “Сўғдиёна” спорт мажмуасида "Сўғдиёна" ва "Сурхон" жамоалари ўзаро куч синашади. Мазкур баҳс олдидан сизга муҳим маълумотларни тақдим этамиз.

"Сўғдиёна" томонларда...

“Сўғдиёна” жамоаси жорий мавсумда жуда яхши футбол намойиш қилмоқда. Жамоани тажрибали мутахассис - Улуғбек Бақоев бошқаради. Айни вақтда “бўрилар” турнир жадвалида 5-ўринда бормоқда. Жамоа ҳисобида 9 ғалаба, 6 дуранг ва 6 мағлубият бор. Яқинда жиззахликлар иккита мусобақада ярим финал босқичида ўз иштирокларини якунлади. Қизиғи, иккиси ҳам пенальтилар сериясидан сўнг содир бўлди. Хусусан, ОФК Кубоги доирасида “Сўғдиёна” “Куала-Лумпур”га ютқазди, Ўзбекистон Кубогида эса “Навбаҳор”га имкониятни бой берди.

Факт! Суперлига-2022 1-давра учрашувида “Сурхон” 2:4 ҳисобида “Сўғдиёна”га ютқазган эди. Ўша ўйинда Мурод Бобожонов ҳисобни очганига қарамасдан, жиззахликлар ўйин сценарийсини ўз томонларига оғдирган.

Дисквалификация туфайли ҳар икки жамоадан ҳам бир нафардан футболчи ўйинни ўтказиб юборади: Абдужалил Маназаров (“Сўғдиёна”) ва Луисми Кезада (“Сурхон”).

"Сурхон"да нима гаплар?

Охирги 3 та учрашувни "Сурхон" яхши руҳда ўтказмоқда. Айни шу ўйинларда жамоа 2 марта ғалаба қозонди ва 1 марта дуранг ўйнади. 21-тур доирасидаги учрашувда "учар тулпорлар" “Пахтакор”дан очко тортиб олди. Ўша учрашув 1:1 ҳисобида якунланди. Термизликлар сафида ягона гол муаллифи Рубен Санчес Перес бўлганди.

Маълумот ўрнида, "Сўғдиёна" - "Сурхон" ўйини жонли эфирда “Дунё бўйлаб” телеканалида эфирга узатилади.

Манба: "Сурхон" ПФК матбуот хизмати.