Ўзбекистонда ўйнай олмагани сабаби, стандарт вазиятлардан гол уриш сири, терма жамоада жарималарни ким тепиши кераклиги ҳақида Шаҳбоз Умаров билан интервью

Сўнгги йилларда хорижда тўп тепаётган футболчиларимиз сони кўпайди. Аммо уларнинг айримларигина кутилган даражада ўйнамоқда.

Беларуснинг БАТЭ сафида ҳаракат қилаётган Шаҳбоз Умаров ўтган мавcумдаги ўйинлари сабабли Ўзбекистон терма жамоасидан ҳам чақирув олди. SPORTS.uz сайти Умаров билан интервью ташкиллаштирди.

– Ассалому алайкум, Шаҳбоз. Янги мавсумга тайёргарлик қай даражада кечмоқда?

– Янги мавсумга жиддий тарзда тайёргарлик кўряпмиз. Ўтган мавсум чемпионлик учун курашда мағлуб бўлдик. Бу йил мақсадимиз - чемпион бўлиш. Кунига икки маҳал машғулот ўтказяпмиз.

– 5 март куни Беларусь Суперкубогида "Шахтёр"га қарши майдонга тушасизлар. Бу ўйин ҳақида нима дейсиз?

– Шу ўйин билан янги мавсумни бошлаймиз. Кураш икки тенг кучли жамоа ўртасида кечади. Бу ўйинда ғалаба қозониб, мухлисларимизни хурсанд қилмоқчимиз.

– Икки йилдан буён Беларусь чемпионатида ҳаракат қиляпсиз. Жамоангизни ўзгартириш вақти келмадимикин?

– БАТЭ билан шартномам бор. Таклифлар йўқ эмас, аммо бу ҳақда гапириш тўғри, деб ўйламайман.

– Охирги йилларда Беларусь чемпионатида ўзбек футболчилари кўпайганди. Аммо бу йил фақат сиз ва Абдихолиқов қолдингиз. Футболчиларимизнинг бу ерда ўйнаб кета олмаганига нима сабаб бўлди?

– Менимча, ҳамма келажагини ўйлаб иш қилди. Айрим футболчиларимиз бу ерда ўйин амалиётисиз қолиб кетаётганди.

– Беларусь чемпионатининг савияси ҳақида гапирсангиз. Кўпчилик уни бизнинг Про-Лига даражасида, деб ҳисоблайди.

– Ушбу фикрга умуман қўшилмайман. Қанақасига бундай бўлиши мумкин. Беларусь клублари Европа Чемпионлар Лигасида ўйнайди. Бу футболни тушунмайдиганларнинг гапи.

– "Ўзимизда ўйнаб кета олмаганлар Беларусда бемалол ўйнаб юришибди", деган фикр ҳам йўқ эмас...

– Ким? Шаҳзод Убайдуллаев ва Бобир Абдихолиқов бизда ўйнай олмаганми? Бу гапларга қўшилмайман.

– Сиз БАТЭда катта муваффақиятга эришдингиз. Ўзбекистон чемпионатида ўйнаб кетиш учун сизга нима етишмади?

– Ҳаммаси етарли эди, фақат характерим сабабли ўйнаб кета олмадим, деб ҳисоблайман. Нопрофессионал эдим.

– Беларусь чемпионатининг биздан устунликлари нимада?

– Бу ерда жисмонан кучли футболчилар ўйнайди. Буни аввал ҳам айтганман.

– Катанец келгач, терма жамоадан ҳам чақирув олдингиз. Словениялик мураббий билан жаҳон чемпионатига чиқа оламизми? Умуман бу мураббий ҳақида фикрингиз қандай?

– Сречко Катанец - кучли мутахассис. Машғулотларда жуда талабчан. Ўйлайманки, у бизни мундиалга олиб боради.

– Терма жамоада асосий таркиб учун рақобатчиларингиз етарлича. Улар ҳақида нима дея оласиз? Ўзбек футболчиларининг ўйинларини кузатиб борасизми?

– Менинг позициямда жуда кучли футболчилар ўйнайди. Улар ўсишимга ёрдам беради. Бунинг ёмон тарафи йўқ. Ҳар бирини кузатиб бораман.

– БАТЭ сафида жаримадан бир нечта чиройли голлар урдингиз. Бу устида алоҳида ишлайсизми?

– Машғулотлардан кейин қолиб, жарима зарбаларини тепиб кўраман. Стандартдан гол уриш бошқача завқ бағишлайди.

– Термамизда қайси футболчилар жарима тўпини тепиш керак?

– Менимча, Ғаниев, Шукуров ва Машарипов.

Жалолиддин Қобилжонов суҳбатлашди.