Ўзбекистонлик Канте — Умарали Раҳмоналиев "Рубин" клубига катта интервью берди

Яқинда "Бунёдкор"дан Россиянинг "Рубин" жамоасига ўтган футболчимиз Умарали Раҳмоналиев Қозон клуби расмий сайтига интервью берди.

- "Рубин" варианти қандай пайдо бўлди? Ҳозир сизда қандай ҳис-туйғулар бор?

- Бу ерда мени яхши кутиб олишди, ҳаммаси жойида. Агентим менга “Рубин” варианти ҳақида гапириб берди. Мураббий ва яқинларим билан маслаҳатлашиб, кетишга қарор қилдим. Мен ўзимни Россия футболида синаб кўрмоқчиман. Яширмайман, орзуим - Европада ўйнаш, “Рубин” эса ўзимни кўрсатиш учун ажойиб имконият. Бу ёғига футбол майдонида қилишим мумкин бўлган ҳамма нарсани амалга оширишим керак.

- “Рубин” клуби ҳақида нима дея оласиз?

- Бу ерда футбол учун ҳамма нарса бор - ташкилотчилик, машғулотлар, майдонлар. Қисқаси, барча шароит бор. Қозонни бироз айланиб чиқдим, шаҳар гўзал. Биринчи машғулотни ўтказдим, ўзимни яхши ҳис қилмоқдаман.

- Жамоадошларингиз билан танишдингизми?

- Ҳа, кўпи билан танишдим. Бугун Безруков билан гаплашдик, у биринчи машғулотда менга катта ёрдам берди. Мураббийлар ҳам ажойиб. Ҳозирча, менда ҳеч қандай муаммо йўқ эди. 

- Ёзда "Рубин"га ўтишингиз ҳақида маълумотлар бор эди бўлганди. Клубнинг ўйинларини томоша қилдингизми?

-Ҳа, мен жамоанинг ўйинларини томоша қилдим. Шунингдек, ижтимоий тармоқларда клубга алоқадор видеоларни ҳам кўрдим. Россия футболи Европада ўз ўрнига эга. Бу ерда кўпроқ курашиш кераклиги аниқ.

- Ўзбекистонда Канте лақабингиз бор, дейишади. Шу ростми?

- Ҳа. 2015 йил, “Бунёдкор” академиясида бўлганимда ёши каттароқ йигитлар шундай ном қўйишган.

Қайси позиция сиз учун қулай?

Бу мураббийнинг қарорларига боғлиқ. Мен таянч зонасида яхши ўйнай оламан. Ўзбекистон чемпионатида иккинчи давра бошқа позициясида ўйнадим, яъни бу ёлғон “саккизлик”. Аммо шуни айтишим керакки, мен мураббий қўйган позицияга тезда кўникиб кета оламан.

- Қандай кучли томонларингизни таъкидлаган бўлар эдингиз?

- Мен ўзимга баҳо бера олмайман. Яхшиси, майдондаги ўйиним орқали барчасини кўрсатишим мумкин.

- Мавсумдаги мақсадларингиз қандай?

- Ҳар доим жамоавий мақсадлар устувор. Кейин шахсий мақсадлар мавжуд. Ўзимга ва бутун Ўзбекистонга ўзбек футболчилари Россияда ҳам қандай ўйнаши мумкинлигини исботламоқчи эдим.