Пара тоғ чанғиси бўйича спортчиларимиз халқаро мусобақага тайёргарлик кўришмоқда

Ўзбекистон Республикаси Президентининг 2022 йил 1 июлда имзолаган “2026 йил Милан ва Кортина-д'Ампеццо шаҳарлари (Италия)да бўлиб ўтадиган XXV қишки Олимпия ва XIV Паралимпия ўйинларига Ўзбекистон спортчиларини комплекс тайёрлаш тўғрисида” қарори ижросини таъминлаш мақсадида Ўзбекистон Миллий паралимпия қўмитаси томонидан фаол иш олиб борилмоқда.

Жумладан, ногиронлиги бўлган инсонлар ўртасида қишки Паралимпия ўйинлари дастурига киритилган спорт турларини оммалаштириш ва ривожлантириш, уларга зарур шарт-шароитлар яратиш қўмитанинг асосий вазифаларидан бири ҳисобланади.

Айни кунларда пойтахтимизда жойлашган “Ice City” комплексида Юлдуз Махмудова, Асел Турдимуротова, Фирдавс Худоятов ҳамда Комрон Абдувохидов тренерлар - Дмитрий Питиримов ва Ольга Баранова қўл остида пара тоғ чанғиси спорт тури бўйича машғулотлар олиб бормоқда. Улар жорий йил 23-27 ноябрь кунлари Австриянинг Ректерхоэ шаҳрида бўладиган халқаро мусобақада иштирок этиши режалаштирилган.