Патрис Эвра: "Агар, Фергюсон ҳозир мураббийлик қилганида, қамоқда ўтирган бўлар эди"

"Манчестер Юнайтед" собиқ ҳимоячиси Патрис Эвра жамоанинг собиқ бош мураббийи сер Алекс Фергюсон ва ҳужумчи Данни Уэлбек ўртасида юз берган воқеани эслаб ўтди.

"Агар сер Алекс Фергюсон ҳозир мураббийлик қилаётганида, эҳтимол, қамоққа тушарди. У футболчиларга қандай бақирганини, уларга бутса улоқтирганини эсласам, қанча йиғлаган ўйинчиларни кўрганман. У жуда қаттиқ қўл эди.

Уэлбек билан бўлган воқеани эслайман. Бу Саудияда ўтказилган ўртоқлик учрашуви эди. Бизнинг фойдамизга пенальти белгиланди, Уазза (Уэйн Рунининг лақаби) тўпни Уэлбекка берди, у эса пенальтидан гол уролмади. Учрашувда ютқаздик, лекин бу шунчаки ўртоқлик ўйини эди.

Кейин кийим алмаштириш хонасига кирдик. Бирданига Фергюсон бақирди: "Уэлбек! Уэлбек!" У уни излаётганди. Мен ва Уэлбек ҳожатхонада эдик. Фергюсон эса қичқиряпти: "Сен ўзингни ким деб ўйлаяпсан?! Яқиндагина асосий таркибга кирдинг-у, энди пенальтини тепмоқчи бўлдинг! Ҳеч қачон бундай қилма!"

Мен уни тинчлантиришга уриндим, аммо у гапимни бўлиб: "Менга бу фақат ўртоқлик ўйини бўлиши аҳамиятсиз! Сен бундай бошқа ҳеч қачон қилма!" — деган эди", — дея ҳикоя қилди Эвра SDS подкастида.