Пауло Коста қоч, Роби келмоқда! (Сўровнома)

Хабарингиз бор, 18 февралга ўтар кечаси “UFC 298” турнири старт олади. 2-марказий жангда ўрта вазн тоифаси собиқ чемпиони Роберт Уиттакер бразилиялик Пауло Костага қарши октагонга кўтарилади. Ушбу қарама-қаршиликдаги имкониятлар борасида биз яна ўзбек яккакурашлар олами вакилларини фикри билан қизиқдик.

Шербек Билолов – мураббий

- Яхши жанг бўлади. Тўғриси, Роберт Уиттакерга ишонмаяпман. Нимани эвазига ғалаба қозона олишига... Менимча Костани “партер”га торта олмаса керак. “Стойка”да ҳам Костадан устун деб айта олмайман. Зарба кучи борасида эса Костага яқинлаша олмайди. Тезлик борасида устун дейишимиз мумкин. Бироқ, бу камлик қилади. Мени фикрим бўйича бу жангда Коста ғалаба қозонса керак. 55/45 Коста!

Сардор Сулаймонов – менежер

- Жанг ҳақида фикрим, тенг ва бир-бирига мос рақибларлар, деб ўйлайман. Агар, жанг тўлиқ давом этса Уиттакер ғалаба қозонади. Коста муддатидан аввал жанг тақдирини ҳал қилмаса, юқорида айтиб ўтганимдек, очколарга кўра Уиттакер ғалабани илиб кетади. Барчаси уларнинг жисмоний ҳолатига боғлиқ. Ким жангга тайёргарлик босқичини тўғри ва яхши йўлга қўйган бўлса, ўшанда имкониятлар кўпроқ бўлади.


Озодбек Пардаев - менежер

-  Роберт Уиттакер аввалги жангдаги мағлубиятдан қанчалик чиқиб кета олганлигига кўп нарса боғлиқ. Мени фикримча барибир ўша мағлубият ўз таъсирини кўрсатади. Чунки, ўзига нисбатан кучсизроқ жангчи уни мағлуб эта олди. Бу Уиттакерни руҳиятида муаммолар борлигини кўрсатиб қўйди. Ҳа, у зўр жангчи бўлган. Бироқ, вақт ҳам ўз таъсирини кўрсатмоқда. Коста жисмонан бақувват ва у шуни эвазига ғалабани қўлга киритса керак. Имкониятларни 55/45 деган бўлардим. Коста фойдасига!

                                           Шуҳратбек Абдумуталибов - мураббий

- Тўғриси, бу жанг анча эҳтиёткорлик билан ўтса керак. Шиддатли кечади, деб ўйламайман. Роберт Уиттакер аввалги мағлубиятдан кейин ортиқча таваккал қилмайди. У Костани чарчатишга ҳаракат қилади. Лекин сўнги жангида кўрдикки Робини ҳимоясида анчагина камчиликлар кўзга ташланди. Аввалги Роберт Уиттакер эмас! Пауло Коста вабанкка кўп борадиган жангчи саналади. У менимча Робини зарбада тута олади ва муддатидан аввал ғалабани қўлга киритади.  Имкониятлар 60/40. Албатта, бу шахсий фикрим!

Дониёрбек Рўзиев –мураббий

- Ўрта вазн тоифасининг Топ жангчилари тўқнашуви ҳақида сўз юритадиган бўлсак, бу жангда “фаворит” Роберт Уиттакер! У аввалги мағлубиятдан керакли хулосаларни чиқара олган, деб ўйлайман. Қолаверса, Костага нисбатан “арсенал”и ҳам бойроқ. Коста ўрта вазн тоифасига бироз секинлик қилади. Айниқса, Роберт Уиттакердек тезкор жангчи олдида у бирор каромат кўрсатади, деб ўйламайман. Жанг муддатидан аввал якунланишига шубҳам бор. Бироқ, тўлиқ раундлар мобайнида австралиялик жангчи устунлик қилади ва ғалабани қўлга киритади. Имкониятларни 60/40 деган бўлардим.

                                  Ҳумоюддин Мухторов - ММА жангчиси

Қизиқарли жанг бўлади. Роберт Уиттакерни жангларини кўп кузатганман. Костани эса Йол Ромео билан жанги ёққанди. Иккиси ҳам яхши даражадаги жангчилар. Шунинг учун дивизион рейтингида ҳам кучлилар сафидан ўрин олган. Тўғриси, Уиттакерга мухлислик қиламан. У Костадан кўра ранг-барангроқ услубга эга. “Стойка” ўхшамаса, жангни “партер”га кўчиради. Кураши ҳам ёмон эмас. Хуллас, Коста қоч Роби келмоқда! :) Ўйлайманки, Уиттакер ғалаба қозонади. 60/40 Уиттакер!

                                        Асламжон Ортиқов-ONE FC жангчиси

- Жуда қизиқарли жанг бўлади. Роберт Уиттакер собиқ чемпион ва жуда тез жангчи саналади. Бироқ, барибир унда ҳозир пасайиш вақти десам адашмаган бўламан. Пауло Коста габарит жиҳатидан ҳам анча катта ва кучли зарбаларга эга. Менимча бу жангда бразилиялик Пауло Коста ғалаба қозонса керак. Барчасини жанг кўрсатади.