Педри Флик маъқуллаган трансферга қарши чиқди

Сўнгги кунларда «Барселона» номи ПСЖ ярим ҳимоячиси Фабиан Руис билан жиддий тарзда боғланмоқда. Айрим манбаларга кўра, каталонияликлар бош мураббийи Ханс-Дитер Флик испаниялик футболчининг трансферига розилик билдирган, ўйинчи эса ўзи ҳам ватанга қайтиш ғоясига қарши эмас.

Шу билан бирга, жамоа юлдузларидан бири Педри бу трансферга хуш назар билан қарамаётгани айтилмоқда. Бу ҳақда El Nacional нашри Le Parisien манбасига таяниб хабар берди.

Манбаларнинг таъкидлашича, Педри ва Руис ўйин услуби жиҳатидан бир-бирини яхши тушунмайди, улар майдонда бир-бирига мос келмайдиган жуфтлик сифатида кўрилмоқда. Қолаверса, Испания терма жамоасида айнан Фабиан Руиснинг ёрқин ўйини Педрини асосий таркибда иккинчи даражали ўринга суриб қўйгани эслатиб ўтилади.

30 ёшли Фабиан Руиснинг трансфер қиймати Transfermarkt портали томонидан 30 миллион евро атрофида баҳоланган. Унинг ПСЖ билан амалдаги шартномаси яқинда узайтирилиб, 2028 йилнинг ўрталаригача мўлжаллангани қайд этилган.