Петер Шмейхель: "Манчестер Юнайтед" Мартинес ёки Доннаруммани олиши керак эди"

"Манчестер Юнайтед" ёзги трансфер ойнасининг энг муҳим харидларидан бири сифатида 23 ёшли дарвозабон Сенне Ламменсни "Антверпен"дан 21 млн евро ва бонуслар эвазига сотиб олди. Бироқ, клуб афсонаси Петер Шмейхель бу қарорни маъқулламади ва "қизил иблислар"га мутлақо бошқа дарвозабон кераклигини таъкидлади.

"Биз Эмилиано Мартинесни олишимиз керак эди. Ростини айтсам, бизда имконият бор пайтда Жанлуижи Доннаруммани танлашимиз керак эди.

Мартинес билан ҳаммаси тайёр эди, бу ҳақиқатдан ҳам яхши хабар бўлган, чунки у айнан "Манчестер Юнайтед"га керак бўлган дарвозабон. У энг юқори даражада эканини исботлади. Асосий вазифаларни ажойиб бажаради, бундан ташқари, у ҳақиқий етакчи. У шундай дарвозабонларданки, ҳужумчилар икки марта ўйлаб кўради. Унинг майдондаги мавжудлиги ҳаётий аҳамиятга эга. Шунинг учун келишув молиявий сабабларга кўра бузилганини эшитиш жуда аламли бўлди.

Ламменс ҳақида гапирсак, очиғини айтсам, бу хабар чиққанига қадар уни умуман эшитмаганман. У Европа топ-10 лигаси статистикасида яхши кўрсаткичларга эга эканлигини биламан. Лекин бу Бельгиянинг "Антверпен" жамоасида эди, улар бешинчи ўринни эгаллашган. У 8 та пенальтидан 4 тасини қайтарган, лекин футболчи танлашда фақат статистикага қараш хавфли. Статистика сенинг хатодан кейин қандай ҳаракат қиласан ёки "Манчестер Юнайтед" босимига қандай чидамлисан, деган саволларга жавоб бермайди. Бу босим футболдаги бошқа ҳеч қайси клубдагига ўхшамайди.

Ламменс тарихдаги энг яхши харидлардан бирига айланиши мумкин, лекин ҳозирча бу фақат умид. Бу эса ҳозирги "Юнайтед"га керак эмас. Агар биз уни Мартинес билан бирга олганимизда, бу мутлақо мантиқий бўларди: Жаҳон чемпиони бўлган асосий дарвозабон ва унинг ёнида ривожланаётган ёш иқтидорли посбон", – деди Петер Шмейхель "SunSport" билан суҳбатда.