Пикфорд "қуруқ" дарвозабонлар клубига кирди

«Эвертон» дарвозабони Жордан Пикфорд Англия чемпионатида юбилей кўрсаткични қайд этди – у Премьер-лигада 100-марта майдонни гол ўтказмасдан тарк этди. Бу натижага у тўртинчи турда «Тоттенхэм»га қарши ўйинда эришди. Беллашув голсиз дуранг – 0:0 ҳисобида якунланди.

Шу тариқа Пикфорд Премьер-лига тарихида 100 ёки ундан ортиқ «қуруқ» ўйин ўтказган дарвозабонлар рўйхатига 19-дарвозабон бўлиб қўшилди. 

Лига рекорди эса ҳануз Петp Чех қўлида: у «Челси» ва «Арсенал» таркибида жами 202 марта рақибларга гол уриш имконини бермаган. Чехнинг кўрсаткичи энг яқин таъқибчи Дэвид Жеймсдан 33 ўйинга кўп.

Энг яхши дарвозабонлар рўйхатига қўшилиши кутилаётган навбатдаги номзод – «Ньюкасл» посбони Ник Поуп. Унинг ҳисобида ҳозирча 80 та «қуруқ» ўйин бор. Бироқ сўнгги пайтларда Поуп асосий таркибда майдонга тушмаётгани, унинг рекордлар пойгасидаги суръатига таъсир қилмоқда.