Почеттино: Месси барча нарсага таъсир ўтказа олади

АҚШ терма жамоаси бош мураббийи Маурисио Почеттино МЛСда "Интер Майами" шарафини ҳимоя қилаётган аргентиналик ҳужумчи Лионель Месси ҳақида гапирди.

"Мессининг таъсирини ўлчаб бўлмайди, чунки бу ақл бовар қилмайдиган даражада. Нафақат мухлислар учун, балки ҳамма нарса учун таъсир қила олади. У барчани, атрофидаги бутун тузилмани руҳлантира олади. Бу нафақат ҳозир, балки ўрта ва узоқ муддатда ҳам ўз таъсирини ўтказади”, - деди Почеттино CNN телеканалига берган интервьюсида.

Маълумот учун, Месси ПСЖда тўп сурган пайтида Маурисио Почеттино мураббий сифатида жамоани бошқарган. Мессининг “Интер Майами” билан амалдаги шартномаси 2025 йил охиригача амал қилади.