Португалияда Роналдуга қарши чиқишди

A Bola нашри ўз саҳифаларида қизиқарли сўровнома ўтказди: мухлисларга Португалия терма жамоасининг Ўзбекистонга қарши ўйинда қайси таркибда майдонга тушишини танлаш таклиф этилди. Сўров натижаларига кўра, нашр икки хил асосий таркибни эълон қилди: бири – журналистлар танлови, иккинчиси – оддий футбол ишқибозларининг варианти.

Журналистлар таклиф этган Португалия терма жамоасининг асосий таркиби: Кошта – Канселу, Диаш, Инасиу, Мендеш, Витинья, Жоау Невеш, Бруну Фернандеш, Тринкау, Рамуш, Фелиш.

Мухлислар танлаган асосий таркиб: Кошта – Канселу, Диаш, Араужу, Мендеш, Витинья, Жоау Невеш, Бруну Фернандеш, Тринкау, Рамуш, Фелиш.

Эътиборлиси шундаки, ҳам журналистлар, ҳам мухлислар Криштиану Роналдуни асосий таркибдан ташқарида қолдириш тарафдори бўлди. Икки таркибни солиштирганда эса фақат битта фарқ кўзга ташланади: ҳимоя чизиғида Инасиу ўрнига Араужу ёки аксинча майдонга тушиши мумкин.

Португалия – Ўзбекистон учрашуви сешанба, 23 июнь куни бўлиб ўтади.