Превью. "Локомотив" - "Навбаҳор"

Ўзбекистон Суперлигаси 19-туридан ўрин олган баҳсни “Навбаҳор” сафарда  “Локомотив” (Тошкент)га қарши ўтказади.

Мазкур жамоалар Ўзбекистон чемпионатларининг Суперлига (олий лига) ўйинларида ўзаро 39 марта куч синашишган. Мазкур баҳсларнинг 20 тасида “темирйўлчилар” зафар қучишган бўлса, 14 та учрашувда “лочинлар” ғалаба қозонишган. Яна 5 та ўйинда эса жамоалар дурангга имзо чекишган.

Тўплар нисбатидаги кўрсаткич – 58-52, “Локомотив” фойдасига. 

Ушбу клубларнинг ўзаро ўйинларидаги энг йирик ҳисоб 2016 йили қайд этилган бўлиб, унда “темирйўлчилар” ўз майдонларида 5:0 ҳисобида зафар қучишган.

“Лочинлар”нинг “Локомотив” устидан қозонган энг йирик ҳисобдаги ғалабаси 2007 йили ва жорий мавсумда Наманганда қайд этилган бўлиб,  “Навбаҳор” 2007 йили 6:2 ҳисоби, бу йил эса 4:0 ҳисобида зафар қучганди.

Ўзаро баҳсларда тошкентликлар 65, наманганликлар эса 47 очкони қўлга киритишган.

“Локомотив” – “Навбаҳор” жамоалари ўртасида шу кунгача Тошкентда ўтказилган 19  та учрашувнинг 14 тасида “темирйўлчилар” зафар қучишган, 2 та ўйинда дуранг натижа қайд этилган ҳамда 3 та баҳсда “лочинлар” ғалаба қозонишган.

Тошкентда бўлиб ўтган ўйинлардаги тўплар нисбати 39–15, “Локомотив” фойдасига.  

Эслатиб ўтамиз, “Локомотив” – “Навбаҳор” баҳси 20 сентябрь куни Тошкент вилоятидаги “Дўстлик” ўйингоҳида соат 17:00 да старт олади.