Превью. "Локомотив" - "Пахтакор"

Бугун Суперлиганинг 3-тури доирасида "Локомотив" ҳамда "Пахтакор" клублари майдонга тушишади. "Пахтакор" матбуот хизмати беллашув олдидан превьюни тақдим этди.

Чемпионатлар тарихида жамоалар жами 38 бор тўқнаш келишган. Уларнинг 24 тасида "Пахтакор" ғалаба қозонган. 8 беллашувда дуранг натижа қайд этилиб, 6 марта "Локомотив" устун келган. Рақиб дарвозасига 82 гол урган "Шерлар" 32 тўп ўтказиб юборишган. 2020 йилги мавсумда ўзаро ўйинлар тарихидаги энг йирик натижа кузатилган. Ўшанда "Пахтакор" 7:0 ҳисобида муваффақиятга эришган. 2005 йилги беллашувда эса Анвар Солиев рақиб дарвозасига 5 та тўп киритган!

Сафардаги ўйинларда кўрсаткичлар шундай кўриниш олган: 11 ғалаба, 5 та дуранг ва 3 мағлубият. Голлар бўйича устунлик "Пахтакор" фойдасига - 45:19. Меҳмондаги энг йирик ғалабамиз 6:1 натижаси 2005 йил кузатилган.

"Локомотив" ва "Пахтакор" жамоалари ўртасидаги учрашув 14 март, пайшанба куни соат 18:45 да "Локомотив" стадионида бошланади.

"Пахтакор" матбуот хизмати.