Про лигада илк тўқнашув. "Шўртан" - "Қўқон-1912" ўйини олдидан

Эртага “Қўқон-1912” про лигадаги юришини бошлайди. Дастлабки турдаги рақиб — “Шўртан”.

Жамоалар илк бор про лига баҳсларида тўқнаш келишади. Унга қадар жамоалар Суперлига баҳсларида олти марта ўйнашган. Ўзаро ўйинлар статистикасида қўқонликлар тўлиқ устунликка эга. Бу хусусида “Қўқон-1912” матбуот хизмати маълумот бермоқда.

Олти ўйиндан бештасида «Қўқон-1912» жамоаси ғалаба қозонган ва яна битта учрашув дуранг билан якунланган. Тўплар нисбати эса 17:8 Қўқон жамоаси фойдасига.

Клубларнинг Суперлигадаги сўнгги учрашуви 2017 йилнинг 30 сентябрь санасида Қўқонда бўлиб ўтган. Ушбу баҳсда мезбонлар рақибини 4:1 ҳисобида мағлуб этган.

Эслатиб ўтамиз, “Шўртан” – “Қўқон-1912” учрашуви 15 март куни соат 18:00 да бошланади.